Ebya siniya ya 4: Hariho ekyetaago kihango eky’abashomesa ba sayansi

Ebya siniya ya 4: Hariho ekyetaago kihango eky’abashomesa ba sayansi

Ekitongore ekirikora ahabibuuzo ekya Uganda National Examinations Board kyashohoza ebirugire omubibuuzo bya siniya ya 4 ey’omwaka 2017, akasheshe k’eriizooba ahari shaaha 5

Abeegi ahamurundi ogu beyongyeire kukora kurungi n’okwizira omu idaara ry’okubanza n’obucweka 10 ahari 100 kuruga ahabucweka 7.5 omugwa 2016.

Minisita w’eby’obwegyese obw’ahaiguru, Owek. JC Muyingo, yaagira ngu abeegi omwaka oguhwaire beeyongyeire omubaro gurikwingana 2936 kuruga ahari 323276 kuhika ahari 326212 omugwa 2017.

Omubigyezo ebi disiturikiti ya Mukono niyo yaija eyebembeire agandi. Yaakuratirwa Bushenyi, Wakiso, Kampala hamwe na Mbarara. Kandi ekyanga ekya Burugwa-izooba ekirimu disiturikiti eza Bukwo, Butaleja, Buliisa, Bulambuli, Sironko n’ezindi nizo zikirizeyo kukora kubi ebya 2017.

“Ninyenda kukurusya abeegi, abazaire, abashomesa hamwe n’abakuza b’abeegi ahabwa za gureedi nungi ezikozirwe. Ninyenda kugarura amaani omubeegi abo abu ebirugire omubigyezo bibaire bitarigye kugyezaho ogundi murundi kandi batahwa amaani,” nikwo Minisita yaagira.

Okurugiirira omubyashohora, abeegi b’abaishiki bakozire kurungi kukira aboojo omu ishomo ery’orujungu kandi aboojo basingire abaishiki omumashomo agarikukira obwingi.

Omubaro gw’abaishiki abarikushutamira ebibuuzo bya siniya ya 4 obwahati niguguma nigweyongyera kwenda kwingana n’ogw’aboojo. Muyingo nagira ngu, “Abaishiki ku barikushomesibwa, eihanga niriba ryashomesibwa n’ahabw’ekyo buri omwe naashabwa okuta obwegyese omubaana b’abaishiki.”

Omumashomo aga Physics na Chemistry, abeegi baingi tibakozire kurungi kandi abagyerizeho n’obucweka 20 ahari 100 ahabeegi boona abashutamiire ebibuuzo. Okwiba ebibuuzo hamwe n’endiijo mize mibi omubigyezo kubaireho kandi Biology nari eishomo ery’eby’amagara niryo rigiziremu emize mibi egyo mingi n’obucweka 39.7 ahari 100. Biology ekuratsirwe Physics n’obucweka 20, Chemistry n’obucweka 10 hamwe  n’Okubara ahabucweka 6.7 omumize mibi nk’okwiba ebibuuzo.

Abarikuhika 81 nibateekateekwaho kuba bayejumbiire omumize etarikwikirizibwa. 49 baareebekireho omukooti kandi baahairwe bail. 21 baaherize kutunga bondi kandi 11 bari haihi kuza omukooti na fayiro ziriyo ziirabibwamu amaisho.

Okurugiirira ahakubakozire ebibuuzo bya sayansi, hariho ekyetaago kihango eky’abashomesa b’amashomo aga hamwe n’ekyetengo ky’okwihaho enteekateeka mbi y’abazaire ngu amashomo ag’ebya sayansi gagumire munonga.

Omu ishomo ry’orujungu, makisi zigarukire ahansi munonga wagyera-gyeranisa n’omwaka gwa 2016. Eishomo erya Physics (eishomo erikwatiraine n’amaani ag’omumwanya n’agatarikureebwa hamwe n’ebindi…) niryo eishomo erikirizeyo kukorwa kubi kandi kitwaire nikibaho kumara emyaka.

Ekitongore ky’ebigyezo obwahati kikikwaitse ebirugire omubigyezo eby’abeegi barikwingana 4525 kuruga ahamyanya 112 erikuteekateekwaho kuba yaayejumbiire omukwiba ebigyezo n’endiijo mize mibi obu baabaire nibakora ebigyezo.

Kandi Dan Odong, omuhandiiki mukuru wa UNEB nagira ngu, “Okwosha kwizire nikukyendeera. Beitu aboojo nibo barikukira kwosha kukira abaishiki. Kandi abaishiki abaingi abayehandiikiise kubuuzibwa buzima bakaija baabuuzibwa.

Abeegi 55 bakashutamira ebibuuzo omukihome kya Luzira. 3 baija omugureedi y’okubanza, 10 omu ya 2 13 omu ya 3 26 omu ya 4. Omwe niwe agwereire kimwe kandi 2 tibarakozire bibuuzo. UNEB egumiizemu yaareka omwanya gwayo ahabihome bya Luzira kuhwera ahari Luzira omukugarura busya enteekateeka n’amagara g’abasibe.

Abeegi 357 abaine oburemeezi omumagara gaabo nibo bashutamiire ebibuuzo bya siniya ya 4 omwaka gwa 2017. 31 n’empumi, 82 baine obuzibu bw’okuhweza, 61 tibarikuhurira, 79 baine obumuga ahamibiri kandi 61 baine oburemeezi bw’okukwata ebi abashomesa barikuba nibeegyesa.

Odongo naagira ngu, abeegi abatari ahankora ya Boona Bashome bakozire kurungi. Kiine kumanywa ngu abeegi abatari ahankora egi nibaruga omumashomero agatwire nigatunga obushagiki kuruga omugavumenti, obwo amaingi gari ago agarikuraaza abeegi kandi agu ebishare byago bitarikujwarirana n’ebishare ebiteirwe omunkora eya Boona Bashome ahabwa siniya.

Bwanyima y’okushaba kuruga omuri bakuru b’amashomero, abeegi abaashutamiire ebibuuzo beitu bataraheriyo okushashura ebishare by’ishomero tibarikuza kubaasa kutunga ebirugire omubigyezo n’obukwakuba okurabira ahankora y’obutumwa obw’amasimu. Abeegi nibahaburwa kubanza batereeza eby’okushashura ebishare by’ishomero reeru nikwo batungye ebirugire omubibuuzo byabo.

Byarundaanwa Andrew Tushabe