Abashuubuzi baapakasa sente z’aho n’aho ahamushomo gw’ebya siriimu

242
0
SHARE

Abashuubuzi baapakasa sente z’aho n’aho ahamushomo gw’ebya siriimu

N’ebya Lawrence Mulondo, Kampala.

Omushomo hamwe n’omworeko ahabya siriimu guriyo niguha omubaro gw’abashuubuzi omugisha gw’okukora empiiha aho n’aho hamwe n’okutunga abaguzi kuruga omubantu abarikuba bari omumushomo ogu.

Abantu abaingi bariyo nibooreka kandi nibaguza na munonga eby’emikono nka ebiteteeya by’ebitengye, amasaati, emihunde, enkaito, enshaho n’ebindi.

Ebindi birimu sabuuni y’amaizi, ebyokunywa, ebyokurya, obutabo bw’okukwata omungaro hamwe n’ebindi biijukizo by’okujwara ahamubiri ebihandikiireho.

Aba Purojekiti eya Makerere University Walter Reed bamwe omu baaba nibooreka ebintu byabo baagira ngu emishuuburo yaaba negyenda kurungi kandi ngu ahi bwaza kuhikira omu ihangwe baaba baagurize byona ebi baizire nabyo nikwo kutumisa ebindi eby’okuguza kandi obwa hati ebi baaba bariyo nibooreka.

“Twine amatsiko kuguza ebintu ebindi bingi ahi omushomo ogu guraaze kuhwera kandi twine n’amatsiko ngu abo abatwara endagiiriro zaitu nibaija kutumisa ahabintu byaitu,” nikwo Mary Nambirige Mulondo omwe ahari abo aba purojekiti egi arikugira.

Queen Hajarah Asiimwe omwe ahabaaba nibooreka ebintu byabo kuruga omu Uganda Network of Young People Living with HIV and AIDS yaagira ngu babaasa kukwata emirimo kuruga omubantu baingi kubakorera ebintu by’emikono hamwe n’amakampuni

Aisha Kyomuhendo owaaba naaguza sabuuni y’amaizi ahamushomo ogu yaashoboorora ngu yaatunga abantu baingi barikumushaba ku abatendeka. “Okushomesa abantu omukukora sabuuni y’amaizi nikiija kuhwera kwongyera ahantaasya yangye ahi abantu barikwija kuba nibashashura kutunga obuheereza,” nikwo Kyomuhendo yaaba naagira obwo aijwire akamwenyo ahamatama.

LEAVE A REPLY