Abahingi bashobangirirwe n’obutunguuru- Ntungamo.

169
0
SHARE

N’ebya Annita Matsika

Abahingi b’obutunguuru hamwe n’abashuubuzi b’omu tauni kanso ya Rwentobo-Rwahi omu ishaza erya Rushenyi omu disiturikiti ya Ntungamo bariyo bashobangirirwe n’obutunguuru bwanyima y’okuburwa akatare.

Obutunguuru ni kimwe aha bihingwa ebirikukiraho kuhiingwa omu ishaza erya Rushenyi omuri Ntungamo n’omuri za disiturikiti ezigiherire nk’eya Kabale, Kisoro na Rukiga.

Obutunguuru nibuhingwa emirundi 2 omu mwaka kandi nibweera n’ahamataka makye.

 Abahingi n’abashuubuzi nibagira ngu okwiha obutunguuru kuruga omu mahanga g’aheeru nka Tanzania, Kenya, Rwanda n’omu mahanga agandi kiteganiise munonga akatare k’obutunguuru omu kicweka ekyo n’aharurengo rw’eihanga oteireho n’okuteganisa entansya y’omumaka gaabo.

Aba nibagira ngu obutunguuru oburikwihwa omu mahanga g’aheeru n’obw’omutindo gw’ahaiguru kandi bwine akatare wabugyeragyeranisa n’oburikuhingwa omu tauni kanso ya Rwentobo-Rwahi n’omuri za disiturikiti ezindi.

Omuhandiiki w’ekigombe ky’abashuubuzi b’obutunguuru omuri Rwahi, Hillary Ainembabazi nashaba gavumenti okubatungira akatare k’obutunguuru bwaabo.

Ainembabazi naagira ngu sizooni ehwaire, embaafu y’obutunguuru babaire nibagiguza shiringi 10,000 beitu obwahati nibaguguza 8,000 zonka.

#WestUpdates

LEAVE A REPLY