Minisita Otafiire eyesasiize ahabwa za Passport kukyererwa.

169
0
SHARE

N’ebya David Lumu

Minisita w’enshonga z’omunda y’eihanga, Maj. Gen. Kahinda Otafiire ayesasiize abanya-Uganda ahabw’okukyererwa kukora za Passport arikugira ngu kampuni ei gavumenti yapatananiise kubaheereza obutabo tibaine burikumara.

 “Nitubasha okusasiirwa ahabw’okukyererwa kubaheereza za Passports. Kampuni ei twapatanise kutuheereza obutabo nerebuka nka eine obuzibu beitu turiyo nitukora ahanshonga egi,” Otafiire arikushoborora.

Okwesasiza kwa Minisita Otafiire nikwijaho bwanyima y’okwetomboita kuruga omubantu aha kutwara akashoobo omukubaheereza za Passports.

Abamwe nibagira ngu obutabo bwa PassPort oburiho ni bukye kandi nibuheebwa guruupu z’abantu abatooroinwe, ekirikureetera abanya-Uganda baingi basigara bategyereize kandi obwo bashashurire za PassPort ezi.

Omu kwezi kwa 6 omu mwaka gwa 2016, gavumenti ekata omukono aha ndagaano na kampuni ya Germany erikukora za Passport eya Veridos Identity Solutions Group.

Beitu hoona hakija habamu okukyererwa omukwezi kwa 5 omwaka ogu beitu enshonga eg ekaija yakorwaho bagura obutabo obundi.

Abakuru kuruga omu minisiture y’enshonga z’omunda bakaraganisa abanya-Uganda ngu okwezi kwa 8 omwaka ogu kutakahwire, gavumenti neija kuba aine obutabo burikumara, ekitabasikire.

Amahanga g’omu kigombe ekya East African Community gakataho kuhisya ebiro 31/12/2018 kuba nibwo gihaho okuheereza za Passport eza buriijo.

Beitu bwanyima y’okubarukaho kw’oburwaire bwa COVID-19 omu mwaka gwa 2019, amahanga agarikwegaitira omu mukago gw’mahanga ga East Africa gakongyezayo obwire bw’okuheeraho za Passports kuhisya omu kwezi kw’okubanza omu mwaka gwa 2021.

Beitu hoona nabwo, abantu b’omu mahanga aga tibarakwatsire bwire obusya obwateirweho, ekyagyemesereize amahanga aga kweteraho ebiro ebyabo kwenda ngu abantu babaase kutunga za Passports ensya ez’omu mahanga ga East Africa.

Uganda ekataho ebiro 4/04/2022 kandi amahanga agandi nka Rwanda rikataho kukoma okwezi kwa 6 omwaka ogu.

Okurugiirira aha mugambirizi wa Minisiture y’enshonga z’omunda, Simon Mundeyi,  ahamuheeru gw’okwezi kwa 4 omwaka ogu, kimwe kya kabiri ky’abanya-Uganda tibarabasize kushohora aheeru y’eihanga ahabw’okutagira za PassPort ensya.

Minisita Otafiire hoona nabwo agarukire yashoborora aha kuheereza endanga muntu z’eihanga arikukyoreka ngu okugaruza busya ezahwireho n’okwa busha.

#WestUpdates

LEAVE A REPLY