Abatuura bangire ekyombeko ky’egomborora- Kagadi.

106
0
SHARE

N’ebya Thomas Tumwebaze

Abatuura b’omgomborora ya Kanyabebe omu disiturikiti ya Kagadi nibetomboitira abeebembezi baabo ahabw’okukora emirimo y’ekishobobo omukwombeka embuga nkuru z’egomborora yaabo.

Abatuura abaaba beebembirwe mukuru w’entebe y’okubanza ahabwa Kanyabebe Central, Edward Isingoma na ceeyamaani w’omuruka, Evarist Kiseko, nibagira ngu ekyombeko ekikiri aha musingye kyatandikire kwatika kandi obwo kihwereireho esente ezirikwingana miriyooni 31 ezabahairwe nk’entandikwa.

Ekyombeko ky’egomborora ya Kanyabebe ekyatikire. PHOTO: Thomas Tumwebzaze

Aba nibajunana ceeyamaani w’egomborora egi, Ponsiano Barugahare hamwe n’owabaire ari ow’egomborora, Leonard Sebaganda ahabw’okuryangatanisa esente batyo bakahendera barikukora emirimo y’ekishobobo omukwombeka ekyombeko ky’egomborora.

Abatuura nibongyera baagira ngu batwiire barikurara omukishaka abandi barikukomwa bwanyima y’abeebembezi baabo kutandika kubashaba shiringi 20,000 barikugira ngu nazo nez’okwombeka egomborora.

Aba nibagira ngu baine kutiina ngu ekyombeko eki kibaasa kureata obuzibu aha magara g’abantu kyagumizamu nikyombekwa.

Ponsiano Barugahare, ceeyamaani w’egomborora ya Kanyabebe kandi omwe ahabarikujunanwa naagira ngu ku yarebire omusingye gwayatika, akagyezaho kumanyisa owabire ari ow’egomborora kandi ou bahindwire nk’oku ekyombeko kyatikire kandi yaikiriza ku arikuza kukiteereza aha sente ze.

Nagira ngu ow’egomborora niiwe yabaire najunanizibwa aha sente ezi kandi ngu ahari shirinhi miriyooni 31 ezibatungire, miriyooni 17 zonka nizo zaheerize kukoresibwa omu kwombeka omusingye kandi ezindi zakora emirimo endijo.

Eki kigyemeserize RDC wa Kagadi, Nicholas Kamukama okwemereza omurimo gw’okwombeka ekyombeko eki kandi aragiire omubazi w’ebitabo wa disiturikiti okucondooza bakamanya esente ezigiire aha kyombeko eki n’embaririra yaazo.

Egomborora ya Kanyabebe ekatandika omu mwaka 2020 kandi neshangwa ahari Kyakabadiima.

#WestUpdates

LEAVE A REPLY