Pooriisi ezoire miriyooni 37 omuri Kagadi.

220
0
SHARE

N’ebya Thomas Tumwebaze

Pooriisi omu disiturikiti ya Kagadi ezoire esente zirikwingana miriyooni 37 na Piki ebirikutekwatekwa kuba byaibirwe aha mukozi w’omuhindi orikukorera omu tauni ya Kagadi obu yabaire naza omu Bank.

Ahabiro 05/09/2022, haihi na kooti y’eidaara ry’okubanza ahanguuto ya Kagadi-Fort Portal, abainazi ababaire baine emundu, barikutamburira omu motoka eya namba UAY 607P bakatomera omukozi wa Prakhum banking Agency, Mariam Nyangoma batyo bamwibaho esente ezirikurenga miriyooni 85 ezi yabaire naza kubiika omu Bank.

Abainazi aba bakasigaho emotoka yaabo batyo baburaho na Piki 3 ezekika kya Bajaj Boxer kandi emwe yamazire kukwatwa obwo omuhigo gw’okuronda ezindi gurikugumizamu.

Omudumuzi wa Pooriisi ya Kagadi, Kenneth Bakashaba naagira ngu bwanyima y’ekikorwa eki kubaho, bateireho omuhiigo gw’okuronda abainazi aba kandi obwahati bamazire kukwataho 3 oteireho na sente zirikurenga miriyooni 37 hamwe n’emwe ahari za Piki ezirikutekatekwa kuba zaguzirwe aha sente ezi.

Bakashaba naagira ngu esente ezi bazishangire zizikirwe omu itaka omu kyaro kya Kobushera omu gomborora ya Mpeefu bwanyima y’okukwata omuntu wa kashatu orikutekwatekwa kuba yabaire ari mukuru waabo.

Patel Nikunj, omuhindi ou bayibireho esente ezi kandi mukama wa Prakhum Pharmacy omu tauni ya Kagadi asimire Pooriisi ahabw’okutaho oburyo n’amaani omukuronda abainazi aba. 

Nikunj yaagira ngu aine amatsiko mingi ngu esente ezi naza kuzibona.

Nicholas Kamukama Keine, RDC wa Kagadi naagira ngu abainazi aba babaire baine embundu kandi egi tekarebukire.

Nayongyeraho ngu omuhiigo guriyo nigugyenda omu maisho okuhisya obu baratunge embundu egi n’ebindi ebibirwe.

Kamukama naagira ngu esente zoona hamwe n’ebindi bintu ebibirwe nibibarirwamu esente zirikwingana miriyooni 42.

Kamukama narabura abashuubuzi okwerinda abashuma abatandikire kuhunga omu myanya y’etauni ahabwa kamera  z’ahanguuto batyo bakaza omubyaro.

Mariam Nyangoma ou batomiire, bakamucwa amaguru akiri omu irwariro arikutunga okuragurirwa.

Ebizibiti ebikwasirwe bikumiirwe aha Pooriisi ya Kagadi.

LEAVE A REPLY