UGANDA KUHAMYA OMUKAGO NA INDONESIA- Minisita Odongo.

65
0
SHARE

N’ebya Julius Luwemba Na Twinamatsiko Hillary.

Entumwa ya Indonesia omu Uganda, Kenya, Somalia na Democratic Republic of Congo (DRC), Mohamad Hery Saripudin ashabire minisita w’enshonga z’aheeru, Gen. Jeje Odongo kwombeeka ekitebe kya Uganda omuri Indonesia.  

Ebi abigambiire omu rutayaayo rwe orw’ebiro 5 omu Uganda.

Okurugiirira ahari Saripudin, Indonesia eine abantu barikurenga obukikuru 270 kandi Uganda nebaasa kukoresa omugisha ogu kushuburirayo n’okukorerayo ebindi by’entunguuka.

Entumwa ya Indonesia, Saripudin na Minisita Odongo. PHOTO: Julius Luwemba.

Saripudin obaire atayaayire ekitebe kikuru kya minisiture y’enshonga z’aheeru omu Uganda omu mwabazyo gw’orwakabiri, ayorekire omugasho gw’okugira obuheereza omu rurembo orwa Jakarta omu ihanga erya Indonesia obwo agumize ngu eki nikija kuhwera omu kuhamya omukago ahagati ya Uganda na Indonesia.

Obwahati, ekitebe kya Uganda ekiri omuri Malaysia nikikoresibwa Indonesia n’agandi mahanga g’omu kizinga kya Asia.

Saripudin naagira ngu amahanga agamwe gaine ebitebe 2 omuri Indonesia ahi ekitebe kimwe kirikujunanizibwa aha nshonga z’omukago gw’amahanga ago kandi ekindi nikijunanizibwa aha nshonga zaago na Indonesia.

Entumwa ya Indonesia, Mohamad Hery Saripudin na Minisita Jeje Odongo. PHOTO: Julius Luwemba.

Naagira ngu kimwe aha kigyendererwa ekimuretsire omu Uganda n’okwenda kuhamya eby’obushuubuzi, eby’oburambuzi hamwe n’eby’obwegyese ahagati y’amahanga aga 2.

Entumwa ya Indonesia, naagira ngu gavumenti ye eteireho okushoma kwa busha kw’abantu 250 abarikuruga omu mahanga agandi omunsi yoona kuza kushomera omuri Indonesia.

Suleiman Turye, orikukurira eby’obushuubuzi omu Uganda na Indonesia naagira ngu Uganda ekatandika kukwatanisa na Indonesia kuruga kare omu myaka ya 1990’s, n’omusingye ogwayobekirwe omugyenzi Kirunda Kivejinja- owabaire ari omuhwezi w’enganzi y’eihanga.

Minisita Jeje Odongo asiimire enkwatanisa nungi eri ahagati ya Uganda na Indonesia kandi baganire ahaky’okuhamya omukago ogu.

LEAVE A REPLY