ABEEGI 100 BASHOBANGIIRIIRWE AHARI NYAKABAARE PRIMARY SCHOOL – RWAMPARA

121
0
SHARE

ABEEGI 100 BASHOBANGIIRIIRWE AHARI NYAKABAARE PRIMARY SCHOOL – RWAMPARA

N’ebya CHRISTOPHER AHIMBISIBWE

N’obu Gavumenti erikuhweraho amashomero agatandiikirwe ediini omu ihanga,  kwonka amaingi gari omu mbera mbi ahabw’obutatunga  obushagiki kuruga omu Gavumenti.

Eishomero rya Nyakabaare primary school eriri kushangwa omuri Rugando Rwampara, nirimwe omu mashomero agatandiikirweho ediini omu mwaka gwa 1939.

Ahu turikugambira ebi ,abazaire, abashomesa hamwe n’abeegi b’ishomero erya Nyakabaare primary school, bashobangiiriirwe bwanyima y’enjura y’amaani kutwara ekicweka ky’ekyombeko ahu abeegi babaire nibashomera.

Ekyombeko ekitwairwe enjura ah’ishomero eri….Photo by Christopher Ahimbisibwe

Abazaire n’abashomesa abu twagambaho nabo niboreka oku bariyo bashobangirirwe n’abeegi barikurenga omuri 100 ababaire nibashomera omu kiibina ekigwaire. Niboreka ngu Gavumenti ekasigara kuguma nebahurikiriiza ahabw’okuba tibaine buhwezi bwona obu batungire kuruga omu Gavumenti.

Kurugiirira ahari Mukuru w’eishomero eri, Ndyomugyenyi Asaph, nakyoreka ngu  ekicweka kimwe ky’ekyombeko  ekigwire nikimwe aha byombeko ebyayombekirwe abazaire emyaka 40 enyima kandi nikyo kimwe ekibaire kirimu na ofiisi z’eishomero

“Obwahati tushobangiiriirwe n’abeegi barikurenga 100 ababaire nibashomera omu kibiina ekigwaire, tibaine ah’okushomera kandi n’ahansi y’omuti ahu turikubata enjura nebateera.”  Ebyo n’ebigambo bya Ndyomugyenyi Asaph Mukuru w’eishomero.

Mukuru w’ishomero Ndyomugyenyi Asaph…Photo by Christopher Ahimbisibwe

Obwahati  mukuru w’eishomero nashaba gavumenti kubahwera ekaheeza ekyombeko  ky’emiryango ena eki abazaire babaire batandiika kwombeka emyaka etano enyima kwenda kumaraho ekizibu ky’okubura ebyombeko ah’ishomero eri.

Oijuke ngu eishomero rya Nyakabaare nirimwe omu mashomero agarikuyamba abazaire ahu abeegi barikurenga 450 barikwegyera. Aha byombeko biina ebiri ah’ishomero eri, gavumenti eyombekireho ebibina bibiri byonka, ekirikworeka ngu abazaire hamwe nabanywani b’eishomero eri nibo batairemu amaani maingi kureeba ngu eishomero eri ryatunguuka.

LEAVE A REPLY