Abajubi b’eby’enyanja aba Congo bagaruzibwe owaabo.

154
0
SHARE

N’ebya Peter Abaanabasazi

Ab’eby’okwerinda omu kyanga ekya Albertine barekwire abajubi b’eby’enyanja aba Congo 35 ababaire bakwatiirwe aha nyanja ya Albert omu disiturikiti eya Kikuuba kandi babagarwize omu ihanga ryaabo.

Abajubi b’eby’enyanja aba Congo baakwatsirwe barikujuba eby’enyanja aha maizi ga Uganda haihi n’omwaro ogwa Sebigoro ogurikushangwa omu disiturikiti ya Kikuube.

Aba bahiikire nibatwarwa aha pooriisi yaha mwaro gwa Sebigoro ahi babaire bakomiirwe aha mushango gw’okutaha omu Uganda omu buhenda biragiro n’okukoresa amato n’obutimba butahikaine na mutindo ogurikwetengwa omu kujuba.

Pooriisi negira ngu abajubi b’eby’enyanja bakataaha omu Uganda barikurabira aha maizi n’amato 9 agatarikwikirizibwa hamwe n’obutimba bw’okukoresa omu kujuba kandi byoona bikwatsirwe byaheebwa ab’ekitongore ky’amahe ga UPDF ekirikukunanizibwa aha kujuba ekya UPDF fisheries protection Unit-FPU kubyosya. 

Amato n’obutimba ebi aba Congo babaire nibakoresa ebyokiibwe: PHOTO: Peter Abaanabasazi

Maj. Richard Mafabi, Omuduumizi w’ekitongore eki naagira ngu nibeija kugumizamu n’emihigo aha nyanja okuhisya obu enjuba mbi erahwereho kimwe omu ihanga.

Naagira ngu nabwanyima y’okukwata abantu aba, bagambireho n’ab’eby’okwerinda aba Congo baikirizana kubagaruzibwa omu ihanga ryaabo erya Congo.

Abajubi aba babaire nibaruga aha myaro nk’ogwa Kasenyi na Tchomia omu kyanga ekya Ituri omuri Burugwa-Izooba bwa DRC.

Amlan Tumusiime, RDC wa Kikuube naagira ngu obwahati eby’okwerinda byongiirwemu amaani aha nsharo ya Uganda na DRC kureeba ngu tihagira bajubi b’eby’enyanja aba Congo abagaruka kutaaha omu Uganda kujubiramu.

LEAVE A REPLY