William Ruto asingire akaruuru ka Kenya.

128
0
SHARE

Omuhwezi wa Purezidenti William Ruto aharw’okubanza (15/08/2022) arangiirirwe nk’omusinguzi w’akaruuru k’okutoorana Purezidenti wa Kenya.

Beitu okurangiirira ebirugire omu kuteera akaruuru kubiremu okurwana bwanyima ya bamwe omuri bakamishana b’akakiiko k’eby’oburuuru kwanga kwikirizana n’ebirangiriirwe.

Mukuru w’akakiiko k’eby’oburuuru aka Independent Electoral and Boundaries Commission (IEBC), Wafula Chebukati, naagira ngu Ruto asingiire n’obucweka 50.49 ahari 100 omu karuuru akateirwe ebiro 09/08/2022 kandi Raila Odinga obaire owakabiri aihireyo obucweka 48.85 ahari 100.

“Nyemerire omu maisho ganyu ahagati y’okutinisirizibwa, nkoziire omurimo gwangye okurugiirira aha biragiro by’eihanga rya Kenya,” Chebukati nikwo arikushoborora.

“Okurugiirira aha kiragiro, ni ndangiirira Ruto William Samoei nka Purezidenti wa Kenya otooroinwe”.

Beitu okurangiirira Ruto kutakabaireho, ba komishona 4 b’akakiiko k’eby’oburuuru ahari ba komishona 7, nibagira ngu tibarikwikirizana n’ebirugire omu karuuru aka obwo bagumize ngu habiremu ebitagyenzire kurungi omuri okwiba akaruuru.

Bwanyima y’okuheeza kumurangirira, Ruto araganiise kwija kukorera hamwe n’abeebembezi boona ab’omu Ihanga rya Kenya.

Ebirugire omu karuuru tibibaire birungi ahari Odinga, omwebembezi w’orubaju oruhakani ow’emyaka 77 obaire aine obushagiki bwa Purezidenti Uhuru Kenyatta.

Beitu ekitangarize buri omwe omu kurangiirira, omuhwezi w’amukuru wa kakiiko aka IEBC, Juliana Cherera agambire abanyamakuru ngu we na bataahi be 3 tibarikwikirizana n’ebi Chebukti arangiirire.

“Beitu hoona, orwingi rwigwire ahari abo abarikwenda kuza omu kooti kandi ahabw’enshonga egi, ninshaba abanya Kenya okugira obucurera ahabw’okuba ekiragiro nikija kukora,” Cherera nikwo arikugira.

Kenyatta, ow’emyaka 60, ategyekire encuro 2 kandi abaire atarikubaasa kugaruka kwesimba aha ntebe y’obwa Purezidenti.

Omuntu kusinga akaruuru k’obwa Purezidenti abaire aine kutunga obucweka 50 ahari 100 n’okweyongyerayo nainga hakiri kimwe ky’akana ky’oburuuru kuruga omu mashaza 24 aha mashaza 47 ga Kenya.

LEAVE A REPLY