Okuteera akaruuru kuriyo nikugyenda omu maisho omuri Bukimbiri-Kisoro

164
0
SHARE

N’ebya Simon Peter Tumwine

Abateezi b’akaruuru omu ishaza rya Bukimbiri omu disiturikiti eya Kisoro bariyo nibateera akaruuru k’okutoorana omuny’ishengyero waabo.

Entebe egi ekasigaramu busha omu kwezi kwa 6 omwaka ogu ogwa 2022 bwanyima y’abaramuzi ba kooti ejurirwamu abarimu; Eva K. Luswata na Frederick Engonda Ntende kushazamu okutooranwa kwa Eddie Kwizera owa NRM, barikugira ngu akatooranwa omu muringo gutahikire nikwo kuragiira ngu akaruuru kagarukwemu.

Okushazamu obusinguzi bwa Kwizera kukijaho bwanyima ya James Owebeeyi owa FDC kutaabaza omu kooti arikugira ngu obukongi bw’akaruuru bukaba buriho amaziina g’ababaire betsimbire gagwire ah’izooba ry’okuteera akaruuru.

Aha mwanya ogwa Nyanamo polling station, omu tauni kanso ya Nyanamo omuri Bukimbiri ahi Eddie Kwizera owa NRM aine kuteerera akaruuru, abantu baaba bakiri bakye abarikwija kuteera akaruuru k’eriizooba.

Abateezi b’akaruuru omuri Bukimbiri: PHOTO: Simon Peter Tumwine

Ahari Nyanama polling station, okuriire okuteeza akaruuru aha mwanya ogwo owamanywa nka Wilber yaareebwa akwiise ekipapura kirikworeka ngu Joshua Mutaabazi obaire ayetsimbire omu karuuru aka aha kakongi ka NUP, arugiire omu karuuru aka, arikushaba abantu obutamuteerera akaruuru.

Wilber yamanyisa abateezi b’akaruuru ngu orateerere Joshua Mutaabazi akaruuru, akaruuru ako nikiija kuba nikabarwa nk’akafa.

Bamwe aha bateezi b’akaruuru ba Bukimbiri omu runyiriri: PHOTO: Simon Peter Tumwine

Mutabaazi aheerize kurangirira kuyaruga omu karuuru aka kushagika owa FDC James Owebeeyi beitu harikuburayo eshaaha nka 11 kuhika ah’izooba ry’okuteera akaruuru, arugiireyo yaaza omu kigombe kya NRM kandi araganise kushagika ekigombe eki.

Ab’eby’akaruuru omuri Bukimbiri barikushobora omuteezi w’akaruuru: PHOTO: Simon Peter Tumwine.

Okuhayana okw’amaani omu karuuru aka kuri ahagati ya Eddie Kwizera owa NRM hamwe Asigario Turyagyenda owa independent.

Abandi abeetsimbireho omu karuuru aka ni Owebeeyi owa FDC na Edward Mutaabazi owa Independent.

Ab’eby’okwerinda baateebwa aha myanya y’okuteereraho akaruuru kureeba ngu akaruuru kateerwa omu busingye.

Omu kugambaho na Daniel Nayebare, orikukurira eby’okuteeza akaruuru omuri Kisoro, yaagira ngu akaruuru nikiija kuteererwa aha myanya 72.

Yayongyeraho ngu nibateekateeka abantu barikuhika 32,219 kuba nibo bateera akaruuru k’eriizooba.

LEAVE A REPLY