Okugarukamu akaruuru ka Bukimbiri: Owa NUP agiire omu NRM.

249
0
SHARE

N’ebya Simon Peter Tumwine

Vice Purezidenti, Jessicca Alupo ayegaitsire ah’abandi beebembezi ba NRM kurondera akaruuru Eddie Kwizera omu kugarukamu akaruuru k’okutoorana omuny’ishengyero w’eishaza rya Bukimbiri omu disiturikiti ya Kisoro.

Vice Purezidenti Alupo, Mutabaazi owa NUP(rwagati) na Kwizera: PHOTO: Simon Peter Tumwine

Okuronda akaruuru k’abarikuhayanira entebe egi kuhendire nyomwebazyo ebiro 10.08.2022.

Arikugambaho n’abatuura omu kyaro kya Kashara ah’ishomero erya Kisharu, Alupo ashabire abateezi b’akaruuru okushagika okwatsire ebendera ya NRM omu karuuru aka.

Ashabire abantu ba Bukimbiri okuteera Kwizera akaruuru ngu ahabw’okuba niwe arikubaasa kubahisyaho puroguraamu za gavumenti eza disiturikiti hamwe n’obuheereza burungi.

Abantu abaizire aha ruterane rw’okurondera owa NRM akaruuru: PHOTO: Simon Peter Tumwine

 “Aha rwakana mwije omu bwingi muteerere owa NRM akaruuru ahabw’okuba niwe ashemereire entebe egi ey’omuny’ishengyero.” Alupo arikushoborora.

Entebe egi ekasigaramu busha bwanyima ya kooti ejurirwamu kushazamu okutooranwa kwa Kwizera omu ncwamu ya kooti ei bangizire ngu akatooranwa omu muringo gutahikire ngu ahabw’okuba ekishushani kye ekyabaire kiri aha kakongi k’akaruuru kikaba kitarikumuhisha.

Aha ruterane nirwo rumwe, enganzi y’eihanga- Robbinah Nabbanja ahamiize abantu ngu obusingye hamwe n’okugira eby’okwerinda bihamire nigwo musingye mukuru gw’entunguuka.

Agizire ngu ahabw’amashomero kuba makye omu kyanga eki, gavumenti neija kwombeka amashomero haihi omuri buri gomborora kubaasa kutunguura omutindo gw’eby’obwegyese.

Aha mukoro nigwo gumwe, Joshua Mutabaazi- ow’ekigombe ekya NUP obaire ayetsimbire omu karuuru aka kandi obaire yakarugiremu kushagika owa FDC, James Owebeeyi agiire omu kigombe kya NRM kandi ayakiirwe Alupo, Nabbanja, omuhandiiki w’ekigombe kya NRM Richard Todwong n’abandi beebembezi b’ekigombe eki.

Obwahati, abantu 3 nibo barikuhayanira entebe egi ey’omuny’ishengyero wa Bukimbiri kandi aba barimu: Kwizera, Owebeeyi hamwe Asagariyo Turyagyenda- otaine kigombe kyayiziremu.

Bamwe omu bakuru omu kigombe kya NRM abegaisire aha kigombe kurondera Kwizera akaruuru harimu: Minisita w’eby’okwerinda, Maj.Gen. Jim Muhwezi, Minisita w’ebya tekinologiya, Dr. Chris Baryomunsi, David Bahati n’abandi bingi.

Muhwezi, Dr.Baryomunsi na Bahati aha kurondera Kwizera akaruuru: PHOTO: Simon Peter Tumwine

LEAVE A REPLY