Okwiruka kw’amagara na Ruhanga, abaikiriza baashabwa kurinda gye emibiri yaabo- Kagadi.

814
0
SHARE

N’ebya Thomas Tumwebaze

Obwo ekereziya ya St. Mary’s Vicariate Catholic Parish erikwetebekanisa kujaguza emyaka 25 kuruga etandika, haabaho okwiruka eriiooba oku baayeta okw’amagara hamwe na Ruhanga nk’omuringo gumwe gw’okwijusya abaikiriza ngu bashemereire kurinda gye emibiri yaabo.

Okwiruka oku okwa kiromita 8, kwaaba okwetoorora enguuto z’omu tauni ya Kagadi kurabira aha ruguuto orwa Hoima-URDT-Kazairwe -Kabalega-Kampala kugaruka aha kereziya  kandi kwayetabwamu abaikiriza kuruga omu madiini goona otireho n’abebembezi b’endengo zitari zimwe.

Bamwe aha bayetaba omu kwiruka: PHOTO: Thomas Tumwebaze

Msgr. Peter Kaberenge- Vicar wa St. Mary’s Kagadi Vicariate naagira ngu eki nikiheereza amagara marungi entaama za Mukama kandi n’okworeka abantu ngu Mukama ariyo nategyeka ensi ye.

Barnabas Tinkasimire, Omuny’ishengyero wa Buyaga West kandi owaaba ari omwiruki mukuru yaagira ngu okwiruka nikuhweraho omu kurwanisa endwara zitari zimwe nk’eya Puresha, omutima, n’ezindi ezirikureetwa obutakor bisasayizi.

Tinkasimire naagira ngu ekereziya eriyo n’eza kuhwa okwombekwa kandi yaashaba abaikiriza okukorera hamwe okumaririza omurimo gw’okwombeka ekereziya egi obwo erikujaguza emyaka 25 omu buheereza.

Hon. Barnabas Tinkasimire n’abandi abahika aha kwiruka: PHOTO: Barnabas Tinkasimire.

Abayejumbira omu kwiruka oku baagira ngu eki nikiza kubahwera okugira amagara marungi hamwe n’okureetaho obumwe n’amadiini agandi.

Bamwe aha biruki barikukora ebisasayizi: PHOTO: Thomas Tumwebaze.

Ekereziya ya St. Mary’s Catholic Parish ekatandika omu mwaka gwa 1997 kandi ebiro 07/08/2022 neija kuba nejaguza emyaka 25. Omugyenyi mukuru naateekateekwa kuba ari Enganzi Y’eihanga, Robbina Nabbanja hamwe na Biishopu wa dayosisi ya Hoima, Rt. Rev. Vincent Kirabo.

LEAVE A REPLY