Purezident wa FDC, Amuriat n’abandi baakwatirwa omu karuuru ka Soroti East.

187
0
SHARE

N’ebya Godfrey Ojore

Okuteera akaruuru kuriyo nikugyenda omu maisho aha myanya 63 y’okuteereraho akaruuru omuri Soroti East, obwo abateezi b’akaruuru barikugarukamu kutoorana omuny’ishengyero orabajwekyere omu Paramenti.

Okuteera akaruuru omuri Soroti East: PHOTO: Godfrey Ojore.

Beitu hoona, Pooriisi yarabura abantu b’omuri Soroti East, omu disiturikiti eya Soroti okwerinda okuhenda ebiragiro by’okuteera akaruuru.

Eki kijaho bwanyima y’okukwatwa kwa Purezidenti w’ekigombe ekya FDC, Eng. Patrick Amuriat Oboi, Owabaireho Omuny’ishengyero wa Kasese, Robert Centinery hamwe na Meeya wa Soroti East Division Paul Omer n’abandi bantu 39.

Omu kihandiiko eki Omugambirizi wa Pooriisi y’ekyanga ekya Kyoga East, Oscar Ageca yaashohoza, Amuriat n’abandi abuyakwatwa naabo, bashangwa nibarondera akaruuru okwatsire ebendera ya FDC omu karuuru aka kurenga ahari shaaha 12 z’omwabazyo ezirikuragiirwa.

Aba bashangirwe aha mwanya gwa Elysian Guest House omu woodi ya Akisim, omuri Soroti East Division omu rurembo orwa Soroti.

Beitu hoona, Omuny’ishengyero omukazi ahabwa disiturikiti eya Soroti, Anna Adeke Ebaju yahakanisa ebi Pooriisi erikugamba obwo agumize ngu Amuriat n’abandi babashukyera “Pepper Spray” obu baaba babyami.

“Amuriat yakwatiirwa omu nju ye ahari shaaha 5 z’ekiro abyami atarikuronda karuuru. Amadirisa g’enju yangye g’ebirahuri gateirwe pooriisi gasisikara’, Ebi n’ebigambo bya Ebaju.

Bamwe omu beebembezi ba FDC abari omu karuuru ka Soroti East: PHOTO: Godfrey Ojore

Ah’ishomero erya Moru Apesur Purayimare, eririho emyanya 6 y’okuteereramu akaruuru, Pooriisi yaakwaata omuhwezi wa Loodi Meeya wa Kampala, Doreen Nyanjura barikumutura okugambwa kuba yaaba ariyo nateeganisa entwaaza y’okuteera akaruuru.

Mukuru w’akakiiko k’eby’oburuuru, Justice Simon Byabakama ahikire omuri Soroti omu kiro ky’orwakashatu (27/07/2022) kureeba oku akaruuru aka karaterwemu.

Ebyo bikiri aho, abetsimbireho omu karuuru aka, Pascal Amuriat ow’ekigombe ekya UPC, Moses Okia Attan owa FDC hamwe Herbert Edmund Ariko owa NRM baheerize kuteera akaruuru kaabo.

Abantu bari omu runyiriri bategyerize kuteera akaruuru omuri Soroti East: PHOTO: Godfrey Ojore.

Okuteera akaruuru aka nikwiija kukingwa ahari shaaha 10 z’omwabazyo eriizooba (28/07/2022).

Omukaikuru nateera akaruuru omuri Soroti East: PHOTO: Godfrey Ojore

LEAVE A REPLY