Abashomesa ba Arts kutunga Miriyooni 4 nk’ezaaba Sayansi.

301
0
SHARE

N’ebya Mary Karugaba

Omuhandiiki w’entuura omu minisiture y’abakozi, Catherine Bitarakwate Musingwire, naagira ngu abashomesa ba Arts nabo nibaija kutandiika kutunga omushara gwa miriyooni 4 nk’ez’abashomesa ba Sayansi.

Beitu hoona, Bitarakwate agambiire akakiiko ka Paramenti akarikujunanizibwa aha nshonga z’obugabe bw’abantu ngu eki nikija kuhikirira bwanyima y’emyaka 5.

Bitarakwate agambiire abany’ishengyero ngu batandiikire n’abashomesa ba Sayansi beitu enteekateeka z’okureeba ngu abashomesa ba Arts nabo batunga omushara nk’ogwa bashomesa ba Sayansi ziriyo nizigyenda omu maisho.

Minisita w’enshonga z’abakozi, Muruli Mukasa, naagira ngu ahari shiringi obuhumbi 800 (800 billion shillings) ezirikwetengwa kwongyeza emishara, baineho shiringi obuhumbi 200 (200 billion shillings).

Minisita w’ensonga z’abakozi, Muruli Mukasa.

Ameezi makye agahingwiire, abashomesa ba Arts bakaza aha kediimo barikuhakanisa ekya gavumenti kwongyeza emishara y’abashomesa ba sciences bonka, ekintu ekyashanyarize okushoma kw’abeegi omu mashomero mingi ga gavumenti.

Okurugiirira aha kuraganisa kw’okushashura abashomesa ba Sciences okwakozirwe, omushomesa wa Sayansi oine Degree naija kuba natunga shiringi miriyooni 4 kandi owa Diploma shiringi miriyooni 3.

Beitu hoona, bwanyima y’ebiro 20, abashomesa ba Arts bakabuganaho Purezidenti, Yoweri Kaguta Museveni kandi baikiriza kushazamu akediimo kaabo bakagaruka omu bibiina kushomesa.

Purezidenti akabagira ngu enshonga zaabo nazimanya beitu ngu niziija kukorwaho omu bicweka.

Omu Paramenti, Siipika wa Paramenti, Anita Among akaragiira Minisita Muruli Mukasa kuhayo rupoota erikushoborora ahanshonga y’abashomesa ba Arts.

Omu rushutamo rwa Paramenti orwo, nyampara w’orubaju oruhakani omu paramenti, John Nambeshe akagira ngu okushoroora omu kushashura emishara y’abashomesa nikireteera baahwa amaani n’okuhuriira batamwa omurimo gwaabo.

LEAVE A REPLY