Omushaho mukuru w’abaana ah’irwariro erikuru erya Mbarara afiire.

362
0
SHARE

N’ebya Fred Turyakira

Eirwariro erihango erya Mbarara, riferirwe omushaho mukuru w’endwara z’abaana omu kasheeshe k’orwakana ebiro 21/07/2022.

Dr. Martin Situma afeerire ah’irwariro eri ahu atwiire naragurirwa tiimu y’abahangu omu by’amagara, okurugiirira aha bigambirwe omugambirizi w’irwariro eri, Halson Kagure.

Banywani be nibagira ngu atwiire atarigye kandi aitsirwe endwara y’ekokoro y’omushokoro “multiple myeloma”. 

Okurugiirira aha kihandiiko eki Kagure ashohoize, Dr. Situma agambirweho nk’omushaija abaire nakunda omurimo gwe oteireho n’okushomesa abeegi batari bamwe.

Mukuru w’irwaririo erya Mbarara, Dr. Celestine Barigye, nawe agambire aha mugyenzi Dr. Situma nk’omushaho okoziregye omurimo gwe ataine kweganda kwona.

Dr. Barigye naagira ngu omugyenzi niwe yatandikireho woodi y’okushemeza abaana ah’irwariro erya Mbarara obu ahika ahirwariro eri omu mwaka gwa 2014.

Omugyenzi Dr. Situma n’omwe aha tiimu y’abashaho abaheerize kutanuragye abarongo abazirwe bakwatiine ahirwariro erya Mbarara.

Aha barikutanura abarongo abaziirwe bakwatine. PHOTO: Fred Turyakira.

Dr. Deus Twesigye, Omushaho Mukuru  ah’irwariro erya Mbarara owayebembire tiimu egi nagamba ahari Dr. Situma nk’omushaija obaire nakunda kushemererwa kandi obaire natwara amagara g’abantu nk’ekintu kikuru munonga.

Dr. Situma asigire omukazi omwe n’abaana 5 abarimu abarongo kandi omwana omukuru aine emyaka 5.

Omubiri gwe nigwija kuziikwa omuri Kataara, Busawula omuri Entebbe aha Sande.

LEAVE A REPLY