Enyanzi Y’eihanga yaayegaita aha kampu obwo akaruuru kutoorana MP wa Soroti karikwirira haihi.

273
0
SHARE

N’ebya Abbey Ramadhan

Obwo okuronda akaruuru omuri Soroti East karikwirira haihi, Enganzi Y’eihanga, Robbinah Nabbanja ow’ekigombe ekya NRM yaaza omu rurembo rwa Soroti eriizooba kurondera obushagiki akwatiire ekigombe eki ebendera omu karuuru aka, Herbert Edmond Ariko.

Ariko nahayanira entebe y’omuny’shengyero wa Soroti East na Moses Attan ow’ekigombe ekya FDC na Pascal Amuriat ow’ekigombe ekya UPC.

Entebe egi ekasigaramu busha bwanyima ya kooti ejurirwamu kushazamu okutooranwa kwa Attan nk’omuny’ishengyero etyo ekaragiira ngu akaruuru kagarukwemu ngu ahabw’okuba okukora ensharo omu ishaza tikurakozirwe gye.

Abetsimbireho obwahati bariyo nibetoorora eishaza eryo, barikuronda obushagiki omu bateezi b’akuuru omu kweteguriira okugarukamu kuteera akaruuru aka ebiro 28/07/2022

Omu kampu ya NRM, Nabbanja yaahika omuri Soroti harikuburayo ebiro 6 byonka, akaruuru kakateerwa n’ekigyendererwa ky’okureeba ngu ekigombe kyatwaara entebe egi.

Ogu yaayakiirwa Capt. Mike Mukula- Omuhwezi wa Ceeyamaani w’ekigombe kya NRM ahabw’ekyanga ekya Burugwa-izooba n’abandi bakuru omu kigombe eki.

Enganzi Y’eihanga, Nabbanja yaayegaita ahabandi beebembezi bakuru omu kigombe kya NRM, abarimu direkita w’ebya Mobilisation, Rosemary Sseninde.

Omugambirizi w’ekigombe kya NRM, Rogers Mulindwa, direkita w’eby’esente, Madinah Nahamya hamwe n’abeebembezi ba disiturikiti ya Soroti ab’ekigombe kya NRM bariyo nibarondera omukwasi waabo w’ebendera obushagiki kureeba ngu yaasinga akaruuru aka akarikuza kuteerwa wiiki erikwija.

Ariko hamwe na Attan bombi baketaba omu karuuru k’okutoorana abany’ishengyero omu karuuru ka boona akateirwe omu mwaka gwa 2021, ahi Attan yayihireyo oburuuru 7, 606 kandi we Ariko akaihayo oburuuru 7, 167.

Okurugiirira aha kakiiko k’eby’oburuuru, eishaza erya Soroti East ryine abateezi b’akaruuru abehandiikise barikurenga omuri 35,0000, za woodi 13, ebyaro 84 hamwe n’emyanya 63 ey’okutereraho akaruuru.

LEAVE A REPLY