Akaruuru k’abany’ishengyero ba Paramenti ya East Africa.

177
0
SHARE

N’ebya David Lumu 

Kalani wa Paramenti, Adolf Mwesige, yaataaho ekiro ky’ebiro 29/09/2022, nk’ekiro ky’okutoorana abajwekyerwa ba Uganda omu Paramenti ya East Africa.

  “Kampeyini hamwe n’okuteerera abantu abarabe bashwijumirwe kandi baahamibwe Paramenti nikwija kukorerwa omu paramenti aha rwakana orw’ebiro 29/09/2022 kutandika na shaaha 4 z’akasheeshe.”

Okurugiirira aha kihandiiko, Mwesige nakyoreka ngu abarikwenda kwesimba nibaija kutandika kwihayo empapura z’okwehandikisa omu ofiisi ya kalani wa paramenti kutandika n’ebiro 01/08/2022.

Mwesige nayongyeraho ngu okuhandiika abarikwenda kwesimba nikwija kubaho ahagati y’ebiro 19/09/2022 kuhisya ebiro 20/09/2022.

 “Okuhandiika nikwija kutandika shaaha 3 z’akasheeshe kuhisya shaaha 11 z’omwabazyo omu kishengye kya Paramenti ey’okukoreramu enterane omu kyombeko kya paramenti,” Mwesige nikwo arikugira.

Naagira ngu buri muntu orikwenda kwesimba naija kuba nashashura shiringi miriyooni 3 ez’okwehandikisa.

Encuro y’abajwekyerwa abariho obwahati omu paramenti ya East Africa nehwayo ebiro 17/12/2022.

Akakiiko akakuuru ak’ekigombe ekiri omu bwebembezi ekya NRM, aka Central Executive Committee (CEC), kaaherize kurabyamu eky’okwongyezayo encuro y’abanyishengyero b’omu paramenti ya East Africa abariho obwahati, encwamu ei bamwe omuri bamemba b’ekigombe bahakanise omu kooti.

Aha rubaju orundi, ekigombe ekya NUP, omu wiikendi, kigizire ngu tikirikwija kuhayo omuntu weena omu karuuru k’okutoorana abajwekyerwa ba Uganda omu Paramenti ya East Africa.

Hariho emyanya 9 ya Uganda kutoorana abajwekyerwa baayo omu Paramenti ya East Africa. Ekigombe ekya NRM ekiine abany’ishengyero baingi omu Paramenti kineho emyanya 6 kandi endijo 3 n’ey’ebigombe by’orubaju orurikuhabura gavumenti hamwe n’abatiine bigombe “independents”.

Omuhandiki mukuru w’ekigombe ekya DP, Dr. Gerald Siranda, Omuhwezi w’omuhandiki w’ekigombe ekya FDC, Haroid Kaija hamwe n’ekikongi ky’amaani omu kigombe ekya UPC, Fred Ebil n’abandi baheerize kutandika kuronda obushagiki omu Paramenti.

Oihireho oburuuru obundu, Omu Uganda, okutoorana abajwekyerwa omu Paramenti ya East Africa nikukorwa abany’ishengyero.

Ahabw’ekigombe ekya NRM, Kokasi y’abanyishengyero ab’ekigombe eki butoosha nibo barikusharaho abarajwekyere ekigombe eki omu Paramenti ya East Africa kurabira omu kwikirizana.

Omukago gw’amahanga aga East Africa harimu amahanga nka Uganda, Kenya, Tanzania, Rwanda, Burundi, South Sudan na Democratic Republic of Congo (DRC).  

Paramenti egi ekateebwaho ahansi y’akacweka ka 9 omu ndagaano y’omukago gw’amahanga ga East Africa kandi buri Ihanga ryine kuheerezayo abany’ishenyero 9 omu Paramenti ya East Africa.

LEAVE A REPLY