Makerere University eyemereize akaruuru k’okutoorana abeebembezi b’abeegi.

180
0
SHARE

N’ebya Omushaki Weitu.

Makerere University Council eyemereize okuteera akaruuru k’okutoorana abeebembezi b’abeegi bwanyima y’okufa kw’omwegi ocumiteirwe omu kurwana ahagati y’abahagizi b’ekigombe ekya Forum for Democratic Change (FDC) na National Unity Platform (NUP).

Mukuru wa University Council, Lorna Magara omu mwabazyo gw’orwakana ahandiikire ebaruha yagyoherereza omuhwezi wa Chancellor wa University egi, Prof Barnabas Nawangwe ei ayongyeire akoherereza Sipiika w’eishengyero Anita Among, omuhwezi we, Thomas Tayebwa na Minisita w’eby’obwegyese n’emizaano Janet Kataaha Museveni n’abandi abarikukwatwaho arikubamanyisa ku akaruuru k’okutoorana abeebembezi b’abeegi ba Makerere University ab’omurundi gwa 88 kemereziibwe okuhisya obu haraabeho okumanyisibwa okundi ahabw’okurwana okurikugambwa kuba kubaire omu kampeyini z’okuronda akaruuru.

Ebaruha ei Kanso ehandiikire Omuhwezi wa Chancellor, Prof. Barnabas Nawangwe

 “Makerere University Council bagwereirwe akagwe ahabw’ebikorwa bitarimu muhoho ebibaire omu hururu y’okuronda akaruuru k’okutoorana abeebembezi b’abeegi aba University egi ab’omurundi gwa 88, ebirugiriiremu okufa kw’omwegi nawe obaire ari omu kusherura akaruuru”.

Kanso hamwe n’abarikwebembera Makerere University baizire nibajumiirira ebikorwa by’emicwe mibi omu beegi ahu barikuhendera basiisire ebintu bya University n’okuhutaaza abeegi n’abakozi ba University egi.

Magara, naagira ngu abarikwebembera University egi hamwe na kanso baizire nibabuganaho abeebembezi b’abeegi kurekyera aho ebikorwa ebyo beitu ebigaaniiro byabo tihaine karungi koona akabirugiremu.

LEAVE A REPLY