Karamoja yaatunga biriyooni 135 z’eby’okurya obwo enjara erikugumizamu n’okuteganisa ekyanga eki.

171
0
SHARE

N’ebya John Odyek 

Gavumenti eteireho shiringi obuhumbi 135 z’okuheereza eby’okurya omu kyanga ekya Karamoja obwahati ekiriyo nikiteganisibwa eibura ry’eby’okurya ahabw’ekyanda.

Enganzi Y’eihanga, Robbinah Nabbanja naagira ngu kabineti eteireho engyenderwaho ezigyendereire kumaraho ekizibu ky’eibura ry’eby’okurya omu kyanga ekya Karamoja.

Bamwe omu banyabutegyeki baangire kimwe eky’okugira ngu hariho eibura ry’eby’okurya omuri Karamoja obwo bagumize ngu enshonga bagiteiremu eby’obutegyeki.

Nabbanja yaamanyisa paramenti ngu kabineti ekwatsirweho munonga ahabw’ekiri omuri Karamoja nikwo kuragira minisiture y’eby’esente okureekura shiringi obuhumbi 135 z’okuheereza abantu b’omu kyanga eki kumara ameezi 3.

Esente nizeija n’okukoresibwa kugabira abantu b’omu kyanga eki ensigo z’okubyara.

Nabbanja naagira ngi kabineti eragiire ofiisi y’enganzi y’eihanga kutwara obuhwezi bw’eby’okurya omu kyanga eki ahoonaho.

Nakyoreka ngu eby’okurya birikwingana metric tonnes 200,000 nibaija kutwarwa omuri Karamoja.

“Nitwetenga obukuumi omuri Karamoja, nitweija kukora ekirikubasika kyoona kureeba ngu tihaine muntu weena owaafa ahabw’okubura eky’okurya. Gavumenti tekatwaraga ente yoona kuruga omu kyanga eki, gavumenti nerinda abantu b’omu kyanga eki”. Nabbanja nikwo arikushoborora.

Peter Mugema, Omuny’ishengyero wa Iganga Municiparite naagira ngu abantu ba Karamoja bariyo nibabonabona.

Mugema naagira ngu abo abagiire Mbale n’omuri za disiturikiti ezigihereire babaire nibabonabona ahabw’enjara kandi abandi babaire bari omu kabi k’okufa.

Abany’ishengyero kuruga omu kyanga ekya Karamoja nibaagira ngu enshonga zaabo ezibarikuhayo tizirikuhurirwa. Nibaagira ngu okutwara obuhwezi bw’eby’okurya tikirikwija kumara ekizibu eki.

Omuhwezi wa siipika wa paramenti, Thomas Tayebwa yaaragira Enganzi Y’eihanga okureeta rupoota erikushoborora gye aha bizibu by’eby’okurya omuri Karamoja n’omu Ihanga ryoona okutwariza hamwe.

Tayebwa yaashaba Nabbanja okubuganaho abany’ishengyero abarikuruga omuri Karamoja na Teso ah’izooba rw’orwakaana baganiire aha kizibu ky’eibura ry’eby’okurya n’enjara.

LEAVE A REPLY