#Ekinihiiro “Rujaburantongo” kitongoziibwe omubutongore. N’ekya 30.07.2022 ahari Kakyeka

894
0
SHARE

N’ebya Denis Nsubuga   

­­­­Abahurikiriza n’abahagizi ba rurangaanwa, Radio West, nibaija kugarumu kucakara omumbaga y’omwaka rugogoma omuri Burengyerwa-izooba, ei buri omwe arikumanya nka Ekinihiiro.             

Radio West etongoizeho Ekinihiiro ky’omwaka ogu aha ofiisi enkuru eza Vision Group omururembo Kampala.

Ekinihiiro eky’omwaka ogu ekyetsirwe Rujaburantongo n’eky’okubaho ebiro 30.07.2022 ahakishaayi Kakyeka omururembo Mbarara.


Okujaguza ogu, kandi okurikugiibwamu ekikungamusisa ky’abantu kucakara n’okushemererwa, nikwija kuba nikujaguza emyaka 23 ei Radio West yaamara omubuheereza.


Embaga egi egarukire bwanyima y’okubura emyaka 2 obu gavumenti ekinga ebiivuru byona erikugyezaho kurwanisa okujanjaara kw’endwara ya #COVID19.

Dickson Nandinda, orikukurira Radio West, agizire ngu okwetebeekanisa kwahwire obwo barikugarura amashemererwa agu Ekinihiiro kirikureetaho ahambaga y’omwaka eya Burengyerwa-izooba.

“Abantu baine eiriho ry’Ekinihiiro, bwanyima y’okumara emyaka 2 batarikujaguza n’okutunga akaire karungi na Rediyo yaabo nyamurungi Radio West. Kandi twetebeekaniise kubachamura. Obwa hati haahikireho ente 10 z’okubaaga, reeru abantu bakasikura enyama obwo turikujaguza emyaka 23 y’obuheereza bw’omutaano,” Manegya Nandinda nikwo arikugira.

Kennedy Mwota, omutebeekanisa w’ebiivuru omu kampuni ya Vision Group agizire ngu hariho ebiconco by’okuha abahurikiriza birikuhisya shiringi miriyooni 100 ebirimu epiki, egaari, za T-Shirt, enofiira hamwe na sente byona kubisingura ahakinihiiro.  

Mwota naagira ngu abarikutaaha omukinihiiro nibaija kushashura shiringi 10.000 kutaahamu. Emiryango neija kwigura shaaha 1 z’akasheeshe kwenda ngu buri omwe aze omubuzaano obu obw’okusingura empiiha. Abeshongozi nyamwingi nabo nibaija kuba bariyo kucamura abahurikiriza n’abahagizi abaraabe bari omukishaayi Kakyeka.

Embaga neija kugumizamu mpaka omu itumbi. Abo boona abaaragiireyo nibamanya oku tubaire nitukikora kandi ahamurundi ogu nikiija kuba eky’amaani nk’okwa buriijo, nikwo Mwota arikugira

Ogu kandi hoona ayongyeire yaagira ngu kampuni ya Vision Group ekwataniise na MTN, Pepsi na Simba Automotives Limited nabo nibaija kuba nibakora nibateebeekanisiza okukora na Radio West kuhisya ah’izooba ry’ekinihiiro. Nihaija kubaho okutaayayira obutare omururembo Mbarara barikurarika abantu kwetebeekanisiza ebiro 30.07.2022

Abantu 25,000 abarabanze kuhika ahakinihiiro nibaija kushashura shiringi 8,000 barikukoresa obuheereza obwa #MTNMomo Pay.

Radio West neekwatirwa ahari 100.2 FM omuri Mbarara, 95.2 omuri Kampala, 91.0 omuri Fort Portal, 94.3 omuri Fort Portal hamwe na 106.6 omuri Masaka.

LEAVE A REPLY