Abeebemebzi b’abasiraamu bayoreka okutiina ahabw’abantu kutahirira amataka g’obusiraamu.

130
0
SHARE

N’ebya Wilson Asiimwe.

Abasiraamu omu disiturikiti eya Hoima baayoreka okukwatwaho ahabw’omuze gw’okutahirira amataka g’obusiraamu kweyongyera, ekibagira ngu kireteire emishango y’akanya omuri za kooti.

Mukuru w’akakiiko k’obusiraamu omu kyanga ekya Bunyoro, Iddi Magezi arikugambaho n’abasiraamu aha muzigiti gwa Bwiikya aha kusaara Eid Adha, yaagira ngu baafeereirwe amataka mingi ahabw’abantu kuguma nibagatahirira ahabw’obutagira byaapa.

Naagira ngu abasiraamu baafereirwe amataka mingi n’esente ahabw’emishango eri omu kooti nahati ekiriyo nehurirwa.

Abasiraamu aha kusaara Eid Adha aha muzigiti gwa Bwiikya eriizooba. PHOTO: Wilson Asiimwe


Emizigiti erikurenga omuri 15 eri omu kooti;

Magezi yayongyeraho ngu enshonga y’okutunga ebyaapa ahabw’emizigiti mingi eizire negambwaho omu nkiiko zitari zimwe beitu tihaine ekirikukorwa.

Naagira ngu okwihaho enshonga y’okumpimagye amataka g’emizigiti n’ebindi bitongore yaaheza kukorwaho, okutunga ebyaapa nikija kuguma kiri ekizibu.

“Obwahati, emizigiti erikurenga omuri 15 eri omu kooti ahabw’emishango y’amataka ahabw’obutagira byaapa, twashaba ba Imam boona okwija omu ofiisi tukabahwera kuraba omuntwaza y’okutungira emizigiti yaabo ebyaapa,” ebi n’ebigambo bya Magezi.

Okukoresa amataka goona;

Nk’omuringo gumwe gw’okurinda amataka g’obusiraamu, okurugirira ahari Magezi, hoona nabwo baashaaba abeebembezi b’omu mizigiti okukoresa amataka goona agataine kigaruho.

 “Abantu abaingi nibakoresa omugisha gw’amataka agataine kigaruho kugaiba, beitu twashaaba abeebembezi kureeba ngu bagakoresa kandi bagabyaraho n’emiti kwenda ngu gateibwa,” Magezi arikushoborora.

Imam w’omuzigiti gwa Bwiikya, Sheikh Muzammil Kayondo, yasiima abasiraamu ahabw’okuhayo sente z’okugura ebinyamaishwa kubaasa kuhikiriza emwe aha mpagi z’ediini y’obusiraamu arikugira ngu nikija kwongyera kuhamya enyikiriza n’okuhamira omudiini yaabo.

Abasiraamu aha kusaara Eid Adha aha muzigiti gwa Bwiikya eriizooba. PHOTO: Wilson Asiimwe

Yabashaba okushabira Uganda kureeba ngu yaagira obusingye n’obumwe omu basriaamu omu Ihanga oteireho n’amahanga agandi omunsi yoona.

LEAVE A REPLY