Abakozi ba gavumenti 4 b’omuri Apac bakwatwa ahabwa puroguraamu ya PDM.

163
0
SHARE

N’ebya Patrick Okino

Abakozi ba gavumenti 4 b’omu disiturikiti ya Apac baakwatwa ahabw’okugambwa kuba baihire aha bantu esente z’okubahandiika, okubatungira “certificate” hamwe n’ebiragiro ahabwa puroguraamu ya Parish Development Model (PDM).

Obuhingwireho, Minisita W’ekikura ky’abantu, Betty Amongi aragiire pooriisi kucondoza omu birikugambwa ngu abarikuta omunkora puroguraamu ya PDM omu disiturikiti egi nibaiha aha bantu esente obwo barikwetebekanisa kuganyirwa omu puroguraamu egi.

Obwo bari omu rukiiko rw’okushomesa aha puroguraamu egi orubaire aha mbuga nkuru za disiturikiti ya Apac, abantu bahaireyo okwetomboita ahabw’esente ez’abakozi ba gavumenti barikubaihaho kuza kuhandika za guruupu kandi obwo gavumenti yagizire ngu okuhandika n’okwabusha.

“Naagwerwa akagwe kushanga ngu n’obu disiturikiti yahairwe esente z’okukora emirimo egi, abarikukurira eby’entunguuka abamwe “Community Development Officers” n’ab’emiruka nibakiha aha bantu esente.” ebi n’ebigambo bya Amongi.

 “Pooriisi eshemereire kuhandiika “statement” kuruga aha barikugambwa kuba nibaiha aha bantu esente, bakabacondozaho oteireho n’okukwata buri mukozi wa gavumenti orashangwe nashoroza esente kuruga omu bantu,” Amongi arikugambira omu rukiiko orubaire aha mbuga nkuru za disiturikiti.

Minisita w’ekikura ky’abantu Betty Amongi: Photo: Patrick Okino

Okurugirira ahari Pooriisi, bigwireho file aha pooriisi eya Apac kandi bantungire okwetomboita kwingi kuruga omu bantu abu baihireho esente.

Omugambirizi wa pooriisi ahabw’ekyanga ekya North Kyoga, Jimmy Patrick Okema naagira ngu bacondorize enshonga egi kandi bakwatsire abakozi ba gavumenti 4 kuhweraho pooriisi omu kucondoza kwayo.

Yaagamba abakwatwa nka; Jacob Okello- Community Development Officer ahabwa Chegere, ab’emiruka abarimu Nixon Odur owa Ongica, Paka Nelson owa Atigolwok hamwe na Egwang Francis owa Chegere.

Okema nayongyeraho ngu banyakukwatwa nibagambwa kuba batwire nibaiha aha bantu esente ezirikwingana shiringi 20,000 kuza kuhandiika za guruupu zaabo eza Parish Development Model.

LEAVE A REPLY