Abaana 3 babuzibwaho barikuruga ah’ishomero omuri Kansanga:

249
0
SHARE

N’ebya Denis Nsubuga

Pooriisi ya Kabalagala eriyo nesherura abaana bashatu abaabuzibwaho barikuruga ah’ishomero.

Andrew Sserugo, omutaka w’ekyanga ekya Kiwafu omuri Kansanga kandi ishe w’abaana 2 yaahika ahakitebe kikuru ekya Vision Group omururembo Kampala kushaba obuhwezi omukusherura abaana aba.

Abashatu aba ni abarongo b’emyaka 4, Queen Esther Sserugo, Aron Andrew Sserugo na Jonathan Lutwama ow’emyaka 7. Lutwama nio mutabani wa muriraanwa wa Sserugo, Moses Nsibirwa.

Aba n’abeegi ba St Henry’s Nursery and Primary School, Heritage zone omuri Kansanga. Okubuzibwaho kw’abaana aba kwabaho nk’ahari shaaha 7 z’eihangwe eriizooba 05.07.2022.

Omubwire obu abaana aba baabuzibwaho, abarongo baaba bajwire yunifoomu z’eishomero: esaati za kapere zirikutukura hamwe n’empare ngufu nazo zirikutukura. Lutwama ow’emyaka 7, orikushoma ekibiina ky’okubanza yaaba ajwire esaati ya kakobe y’emikono miraingwa hamwe n’empare ngufu erikutukura.

Sserugo naagira ngu owaabuzaho abaana aba yabanza kubabeiha-beiha kubagurira soda. Mwine-ishebo ow’emyaka 7, Calton Andrew Sserugo, owaahona okubuzibwaho, yayoherezibwa kugurira abanda soda. Omukugaruka, yashanga omushaija yaaburizeho abandi abaana.

Ogu nikwo kumanyisaho nyina, Daisy Namboya, owatandika okusherura abaana obwo arikubanza n’okumanyisa bariraanwa. Eishomero riri aharugyendo rwa mita nka 500 kuruga omuka.

Abaaba bariyo nibateebereza ngu owaabuzaho abaana aba yaaba ari ahaboda kandi haine ahi yayemerera kugurira abaana ekyokurya ahaduuka eyaaba eri haihi.

Ahi twaza kutungira amakuru aga, poorisi yaaba yaahikire ahamwanya ogu ahi abaana aba baakwatirwa.

Omupoorisi, owahandiika ebyabaho ebi Namboya na Nsibirwa baatebya, obwo bari ahapoorisi, yaagira ngu poorisi eriyo neshwijuma entambi za kamera eza CCTV kureeba emitamburire y’omubisha ogu

LEAVE A REPLY