Purezidenti Museveni ari omuri Nairobi, Kenya

244
0
SHARE

Purezidenti Yoweri Museveni ari omuri Nairobi Kenya kwetaba omu rukiiko rw’omurundi gwakashatu orwa bakuru b’amahanga ga East Africa orugyendereire kugaanira ahanshonga y’okuta amahe omuri DR Congo kugaruraho obusingye n’eby’okwerinda omu eihanga eri.

Abebeembezi b’amahanga 7 agari omu kigombe ekya East African Community nibeija kubuganaho eriizooba kugamba aha nshonga y’eby’okwerinda n’obwimukyero oburi omu Democratic Republic of Congo (DRC) kurugiirira ahari Purezidenti Uhuru Kenyatta.

Orukiiko oru nirwijaho omu bwire obu okurwana omuri Kinshasa na Kigali buri kweyongyera obwo DRC erikujunaana Rwanda ahabw’okushagika ekigombe ky’abahekyera ekya M23.

Rwanda etwaire neyehakana okushagika abahekyera aba obwo amahanga gombi garikwetunga enkumu okutahirira ensharo n’okwihaho amahe gaabo.

Abanyambundu ba ADF hamwe n’abahekyera ba M23 batwaire nibanyangaraza abantu ba Burigwa-izooba bwa DR Congo, enshonga eretsireho obwimukyero omu eihanga kandi n’abatuura kuhungira omu mahanga agandi.

Purezidenti Yoweri Museveni arikurabira aha mukuura gwe gwa Twitter akasheeshe aka yaagira ngu yaaheza kuhika omuri Nairobi Kenya kwetaba omu rukiiko rwabakuru b’amahanga agari omu EAC.

Aha rwakashatu orwa wiiki ehwaire, Purezidenti wa Kenya, Uhuru Kenyatta akashaba okutwara amahe g’amahanga ga EAC omuri Burigw’eizooba bwa DRC kugaruraho obusingye beitu Kinshasa ekagira ngu terikwija kwikiriza Rwanda omu kikwekweto.

Aha kutandika kwa wiiki ehwaire abahekyera ba M23 bakegarurira etauni ya Bunagana eri ahansharo ya Congo na Uganda kandi enkuyanja y’abantu bakahungira omuri Uganda barikuronda obutuuro.

LEAVE A REPLY