Abashomesa ba Arts kugumizamu n’akediimo kaabo;

309
0
SHARE

N’ebya Beth Akatukunda

Abashomesa abarikwegaitira ahansi y’ekigombe kyabo ekya, Uganda National Teachers Union (UNATU), barangirire ngu nibaija kugumizamu n’akediimo kaabo aha kibetsire okubashorora omu by’okubashashura emishara.

Aha kutandiika kw’okwezi oku, abashomesa b’omu kigombe ekya UNATU baakwasize ahansi ebikwato byabo ahabwa gavumenti kwongyera emishara y’abashomesa ba Sciences bonka reero aba Arts ekabareka.

Aharwamukaaga, abebeembezi b’ekigombe ekya UNATU babugaineho abakuru kuruga omu gavumenti ababaire bebeembeirwe Purezidenti Yoweri Museveni aha nshonga egi.

Abeebembezi b’ekigombe ky’abashomesa ekya UNATU ababugineho Purezidenti. Photo: PPU

Omu kihandiiko ekibashohoize baaheza kubuganaho Purezidenti, Omuhandiki mukuru wa UNATU, Philbert Baguma akyorekire ngu gavumenti egiizire ngu ebaire etarikumanya gye ebizibu ebyakubaasa kuruga omu kwongyera emishara y’abashomesa ba science bonka kuhikira kimwe ahari pasenti ya 300 reero aba Arts ekabura kubongyeraho nenushu.

Baguma nakyoreka ngu enshonga egi obwahati etwairwe omu Minisiture y’abakozi hamwe n’ey’eby’esente kushwijuma omu nteekateeka y’okushashura kureeba ngu obutari buringaniza omu kushashara abashomesa bwahweraho kimwe.

Beitu hoona, naagira ngu okugaruka aha mirimo yaabo kukora nikijja kurugiirira aha kuza minisiture zo zirarahukye kukora aha nshonga egi.

Abeebembezi b’ekigombe ky’abashomesa ekya UNATU barikubuganaho Purezidenti. Photo: PPU

Ebyo bikiri aho, Purezidenti Museveni ashabiire abashomesa abari aha kediimo omu ihanga okukemereza nk’oku gavumenti eyehaireyo kushashuragye abakozi ba gavumenti.

Purezidenti okugamba ebi n’obu abaire nabuganaho baamemba b’ekigombe ky’abashomesa ekya UNATU, aha maka g’obwa Purezidenti omuri Entebbe.

Purezidenti Museveni agambire baamemba ba UNATU ngu gavumenti eyehaireyo kushashuragye abakozi ba gavumenti boona, beitu ngu abashomesa ba sciences nibo baine kubanza kukorwaho nk’okubari abantu b’amaani munonga omu kutunguura n’okuhaamya eby’entaansya y’eihanga.

Purezidenti obaire nagarukamu enshonga ezihairweyo Baguma owa UNATU, ahaamize abashomesa ba Arts ngu tibashoroirwe ngu ahabw’okuba nabo n’abamaani beitu ngu amaani gaine kubanza kuteebwa aha bashomesa ba Sciences, obwahati abarikwendwa munonga omu kuhangutsya eby’entaansya y’eihanga.

Ashabire abashomesa obutateganisa enteekateeka za gavumenti ez’okuhaamya eby’entaansya y’eihanga nikwo kubashaba kugumizamu n’ebigaaniro byabo naza minisiture ezirikukwatwaho okuhitsya obu baarahikye aha businguzi aha kikwatiraine n’okushashura emishara y’abashomesa boona.

Aha rubaju rwe, Minisita w’eby’obwegyese n’emizaano, Janet Kataaha Museveni agambiire abebeembezi ba UNATU ngu nk’abantu b’eka emwe basheemereire kushitama bakagonjora enshonga zaabo…

LEAVE A REPLY