Nagudi Fatumah Lyantonde
Ekitongore ekirikujunaanizibwa omutindo gw’eby’emibazi omu ihanga ekya National Drug Authority (NDA) kikwataniise na poriisi bakwatsire abantu 7 abarikuteekateekwaho kuba batwire nibejumbira omukukora hamwe n’okuguza emibazi y’ebicupuri.
Nikigambwa ngu aba babeire nibahindura emibazi y’ebihingwa efiire na bwanyima bataho obumanyiso (labels) bw’emibazi y’enyamaishwa na bwanyima bagiguza abariisa b’amatungo.
Aba okukwatwa kiizireho bwanyima y’abashaho aba NDA kuguma nibashanga emibazi y’ebicupuri etaikiriziibwe omukatare nikwo kutaho omuhiigo kuhisya ahi bagwereire ahabantu aba.
Abakwatsirwe harimu Nuwahana Erick, Kafeero Alex kuruga Kyemamba omuri Lyantonde bwanyima y’okubashanga nibaguza emibazi egi omu duuka yaabo erikumanywa nka Banyankole Vet Drug Shop hamwe na Najjuka Jennifer ou bakwateire Lukaya.
Okurugiirira aha mugambirizi w’ekitongore kya NDA, Abiaz Rwamwiri, obwo arikugambira omurukiiko rw’abanyamakuru orubeire aha poriisi ya Lyantonde, aba abakwatsirwe kuruga Lyantonde babahwereire kubahisya Lukaya aha duuka erikumanywa nka Trust In God farm supply agro-chemicals owa Luswaata Alfred hati okibuzire. Bwanyima y’okubura, baakwata omukazi we, Najjuka Jennifer, obeire ari omuduuka egi kandi aba bashangirwe n’ebintu nk’ebicupa, obumanyiso, ebokisi z’emibazi, ebiriisa by’ebihingwa, ebicoori ebibeire biri omumaka gaabo ekirikworeka ngu nimwo baateire eikorero ry’emibazi egi.
Abiaz Rwamwiri omugambirizi wa NDA yayehanangiriza kandi yaashaba abantu okwetantara kugura emibazi omu maduuka agataikiriziibwe ekitongore kandi ngu omuhiigo nigugumizamu kubaasa kumaraho omuze ogu.
Omugambirizi wa pooriisi ahabw’ekyanga ekya Masaka empango, Nsubuga Muhammad, agizire ngu nibaija kugumizamu barikukwatagana hamwe n’ebitongore ebi kureebeka ngu baajuna amagara g’abantu n’amatungo barikukwata abo abarikucupura n’okuguza emibazi nka egi.
#WestUpdates
#Ekinihiiro 30.07.2022
