Tihaine orikwetaaga kutunga embundu nk’omuntu – Purezidenti Museveni

339
0
SHARE


N’ebya Arnest Tumwesige                                                                                    

Purezidenti Yoweri Museveni naagira ngu tikirikwetaagisa omuntu kutunga embundu nk’omuntu nk’oku bamwe barikugira, bagumize ngu ahabw’okuba enganda ezindi kuruga omumahanga agatuhereire ziine embundu, n’ahabw’ekyo nabo bashemereire kuba baine embundu zaabo nk’abantu.

N’ahabw’ekyo Museveni arabwire abanya Uganda abaine embundu ahanshonga y’okwerinda enganda ezibahereire kuruga Congo, Kenya na South Sudan.

Omukigaaniiro eki agizireho n’abebembezi kuruga omubyanga ebya Lango na Acholi ahari Baralegi omu disiturikiti ya Otuke nyomwebazyo Orwamukaaga 11.06.2022, agizire ngu amahanga aga gonshatu gaine obunywani na Uganda ngu n’ahabw’ekyo kyanguhi kukora ahabambuzi b’amahanga ago.

Obwa hati mukuru w’eihanga ariyo nayetooroora ekyanga ky’amatemba ga Uganda ahi ariyo naabugana abeebembezi by’ebyanga kuhajaana akizibu ky’abanyagi b’ente.

Abanyagi kuruga omukyanga ekya Karamoja, South Sudan na Kenya, nibagumizamu kunyaga ente kuruga omubyanga ebya Lango, Acholi na Sebei.

Obwo bari ahari Baralegi, Purezidenti ashuurwire enteekateeka z’okutandika kworekyerera emiringo 4 y’abanyagi b’ente.

Abebembezi b’ebyanga ebya Lango na Acholi bari ahari Baralegi State Lodge Farm omu disiturikiti ya Otuke barikubuganaho Purezidenti orwamukaaga 11/06/2022. PHOTO: Arnest Tumwesige


“Abaserukare babeire nibarigisa, nibaita nibakwata kandi bata omunkomo abo abanyagi b’ente abarikuba baine obuta n’emyambi beitu hariho abo abarikuba baine enkoni hamwe n’abo abarikuteekateekwaho,” nikwo agizire.

Ashoboroire ngu enyima, abarikuteekateekwaho bakaba batarikugaitwa omuri abo abarikuhiigwa nk’abanyagi b’amatungo. Ayongyeire yaagira ngu ab’eby’okwerinda batandikire kurundaana amakuru n’ebirikukwata ahari abo abarikubaasa kuba nibateekateekwaho kandi na bwanyima baije bakorweho obuhame y’okutunga obuhame burikumara.

Kukora ahakizibu ky’abanyagi, Purezidenti agizire ngu abarikukurira eby’okwerinda ababeire nibarinda emihingo eteirweho omunguuto ezirikuza Karamoja bahindwirwe, emotoka zoona ezirikuba ziheekire ente zirikuraba ahamihingi y’enguuto ezi ziine kukwata ahabutambi bw’ebishushani kandi buri motoka eshemereire kuba ziine obwoma oburikuziranga ahamukura ogwa ‘intaneeti’ omumuringo ogwa kanyabwengye.

“N’obu enamba ya motoka erikubaasa kwihwaho, akooma akarikukorera ahamukura gwa intaneeti n’emotoka nibiija kuba nibireebwa omubyanga bitari bimwe na bimwe. Turikukoresa emiringo ey’obunyakare hamwe n’eriho obwa hati, obunyagi bw’amatungo nibwija kuhendera,” nikwo agizire.

Ayongyeire yaashaba poorisi kutaho abarikukoresa embwa omuringo ogu agizire ngu nigwo muringo ogurikukirayo kukora kurungi omukutooza ente ezirikuba zipakiirwe ahabimotoka

Beitu omuhwezi w’omuduumizi wa poorisi ey’ekyanga kya Kyoga ey’amatemba, Johab Wabwire, agizire ngu omuringo ogu tigurikubaasa kukoresibwa gukabaasa ahabw’okuba ekyanga kiineho embwa emwe.

Eky’omugisha omurungi, Wabwire ayongyeire yaagira ngu embwa emwe nyamunegyere eri omukyanga obwa hati yaakwatsire ente 12 omu disiturikiti ya Amolatar hamwe n’entaama oteiremu n’embuzi 1 omu disiturikiti ya Kwania enshumi nkye ehweire.

Ogu ayongyeire yagambira mukuru w’eihanga n’abandi abebembezi ngu embwa erikuba eine amagara marungi nebaasa kutooza abashuma omumwanya gurikuhika kiromita 30 ngu kandi okwongyera ahamubaro gw’embwa kubaasa kuhwera munonga ahakukyendeeza ekizibu eki.

#WestUpdates
#RadioWestAt23

LEAVE A REPLY