Eky’abajurizi 2022; Nk’oku omukoro gwagyenda!

463
0
SHARE

N’ebya Bethmath Akatukunda
Na Andrew Tushabe

Abaikiriza eriizooba bagaruka ahari Namugongo kukuza ekiro ky’abajurizi ba Uganda eky’omwaka ogu bwanyima y’okumara emyaka 2, batarikuzayo ahabw’endwara ya COVID-19 eyabandamiriire eihanga eri n’ensi yoona.

Ahakiijukizo eky’Abakristaayo, amareeberezi 5 agarikukora ekyanga ekya Ankore empango nigo gayebembera okushaba oku, okwahikwaho omuhwezi wa Mukuru w’eihanga kandi owaamujwekyera, H.E Rtd. Major Jessica Alupo hamwe n’omuhwezi wa sipiika w’eishengyero, Thomas Tayebwa, owaabeireho enganzi y’eihanga Amama Mbabazi n’owabeireho Sipiika w’eishengyero Rebecca Kadaga n’abandi bakungu b’eihanga abatari bamwe na bamwe.

Omwe omubebembezi ba kwaya y’ekyanga ekya Ankore empango arikweshongora ahamukoro. PHOTO: Maria Wamala

Abaikiriza kuruga omu Uganda n’aheeru y’eihanga baayeshuka aha biijukizo by’abajurizi ahari Namugongo ahi abajurizi 45, b’abakristo n’abakuristaayo baitiirwe.

Aba bakaitwa aha kuragiira kwa Kabaka Mwanga II, owaabaire ari Kabaka wa Buganda obwire obwo ahagati y’omwaka gwa 1885 and 1887.

Emikoro y’omwaka ogu yaayebemberwa dayosiisi ya Fort-Portal ahabw’abakristo kandi dayosiisi z’omuri Greater Ankole nizo zaayebembera emikoro y’abakristaayo.

Aharubaju orw’abakristaayo, Hon. Prof Ephraim Kamuntu niwe ayebembeire akakiiko k’okutebeekanisa emikoro y’okujaguza ekiro eki.

Hon. Prof. Ephraim Kamuntu, oyebembeire akakiiko k’okutebeekanisa #UgMartyrs2022 na Hon Mary Karooro Okurut bari ahamukoro PHOTO: Maria Wamala

Kandi hoona Biishopu w’obureeberezi bwa Ankore, Rt.Rev. Dr. Fred Sheldon Mwesigwa yaagira ngu abaramagi 500 nibo batambwire omu ihanga ryona n’okuruga aheeru y’eihanga. Omubaro gw’abaramagi 498 kuruga omukyanga ekya Ankore empango nibo batambwire , reeru abandi bakagyenda omumotoka eki Biishopu Sheldon arikugira ngu gweyongyeireho wagyeragyeranisa n’emibaro ey’enyima.

Omureeberezi wa dayosiisi eya Ankore, Dr. Fred Sheldon Mwesigwa arikuramusya omuhwezi w’omwebembezi w’eihanga, Rtd. Maj. Jessica Alupo owajwekyera Purezidenti Museveni ahamukoro. PHOTO: Maria Wamala

Omubaramagi abakuristaayo omwaka ogu, Kizza Patrick ow’emyaka 81 niwe abeire omuramagi okuzire munonga kutambura mpaka Namugongo. Abaishiki 2 b’emyaka 17 nibo babeire abaramagi abato munonga

Arikuha orubazo rwe, Sheldon yaagira ngu Purezidenti Yoweri Museveni aheireyo shiringi obukaikuru 600 kubaasa kutebeekanisa omukoro gw’eriizooba ogw’okwijuka ekiro ky’abajurizi ba Uganda.

We Ishe-abareeberezi, Stephen Kazimba Mugalu, okujaguza oku yaakugambaho nk’okw’omugisha ahabw’okuba emirundi 2 ey’enyima kukajaguzibwa eihanga rikingire.
Omubigambo bye, “Bwanyima y’emyaka 2, obwo okujaguza omukoro ogu kurikukorwa omumuringo gwa sayansi, nitusiima Ruhanga ahabw’okutuha obwire obu kubaasa kujaguza nk’oku twabeire nitukora obutoosha.”

Ishe-abareeberezi, Stephen Kazimba Mugalu, arikuha orubazo rwe ahari Namugongo. PHOTO: Maria Wamala


Omushaija wa Ruhanga ogu hoona yayoreka okushaaha kwe bwanyima y’omuramagi omwe kuruga omukyanga ekya Nkore kufa bwanyima y’okutambura akahika Namugongo.
“Ninyenda kushaasha n’ab’eka ya Jackline Arinaitwe kuruga omuri Ankore empango, owaramagire akahika aha, akagwa kihuumura kandi akafa omukaire kakye,” Ishe-abareeberezi, Kazimba Mugalu arikutonzya.

Ogu kandi hoona yagaruka yayoreka okukwatwaho ahambeera y’eby’entaasya erikweyongyera kuguma omu ihanga agumize ngu, “Haine ou nshangire arikuguza eminekye ya bogoya obwo arikugiguriza ahabeeyi y’ahaiguru arikugira ngu ebeeyi eyeyongyeire ahabw’orutaro oruri omuri Ukraine. Ninshaba ngu tugiremu okusaasibwa bataahi baitu na munonga twaba nituguza ebintu byaitu kuruga omumyanya yaitu eya haihi nka Kyaggwe omuri Bukunja,” Ishe-abareeberezi Stephen Kazimba Mugalu.

Bamwe omubaaba nibakora bizinensi obwo emikoro y’okujaguza abaafeereire ediini erikugyenda omumaisho ahari Namugongo. PHOTO: Moses Nsubuga

Mukuru w’eihanga Yoweri Kaguta Museveni, omubutumwa obu yaaha omuhwezi we, yajumiirira ekikorwa ky’okwita abaikiririza omuri Ruhanga ekyakozirwe Kabaka Mwanga amakumi n’amakumi g’emyaka agahingwire.

Purezidenti yaagira ngu, “N’obu Kabaka Mwanga yaabeire atarikwikirizana n’enyikiriza y’ediini, akaba atashemereire kukoresa emihanda y’entaro n’emihondano na munonga okwita abantu ahabw’okuba ekintu ekirikuba kyabeireho ahabw’ekikorwa eki, tikirikubaasa kugarurwa enyima.”

Emyanya emingi ey’okukoreramu bizinensi omuri Namugongo yasiiba eijwire ekimbuuro. PHOTO: Moses Nsubuga

Ahamukoro nigwo gumwe, Purezidenti hoona yayongyera yateerera abanya Uganda omuranga kukora n’amaani, bakakoresa kakye aku beine kugyezaho kweyiha omubworo.

Okurugiirira ahari Ishe-abareeberezi, ab’ekyanga ekya Burugwa-izooba nibo barikwija kutebeekanisa omukoro ogu omwaka ogurikwija.

#UgMartyrs2022
#WestUpdates

LEAVE A REPLY