Gen. Sejusa yaata omukono ahabihandiiko by’okuhuumura

468
0
SHARE

N’ebya David Lumu

Bwanyima y’okumara emyaka 24 arikushaba kuhuumura kuruga omumahe ga UPDF, Gen. David Ssejusa orikumanywa nka Tinyefuza eriizooba yaata omukono aha bihandiiko by’okuhuumura kwe.

Ebi byoona byaba aha mbuga nkuru z’ekitongore ky’amahe ga UPDF omuri Mbuya, Kampala.

Gen. Ssejusa n’omwe ahari ba General 34 abu amahe gaateire aharukarara rw’abarikuza kuhuumuzibwa omu kwezi kwa 7.

 “Gen David Sejusa erizooba yaata omukono aha bihandiiko by’okuhumura omuri Mbuya, Kampala. Naija kuhumura omu kikoosi kya 12 omu kwezi kwa 7 omwaka ogu,” Brig. Gen. Felix Kulayigye omugambirizi w’amahe ga UPDF, nikwo yaagira.

Ba General abarikuza kuhuumura amahe baatwire aha kushomesibwa ahaby’okuhuumura kwabo n’ebi bashemereire kweteekateekyera omumaisho.

Omu barikuza kuhuumuzibwa harimu; owabaire ari minisita w’eby’okwerinda Gen. Elly Tumwiine, Ceyaamaani wa kooti y’ekinya-mahe Lt. Gen. Andrew Gutti, Lt. Gen. Joram Mugume, Lt. Gen. Prossy Nalweyiso, Maj. Gen. Stephen Kashaka na Maj. Gen. Joram Kakari.

Abandi ni; Maj. Gen. Phinehas Katirima, Maj. Gen. Elly Kayanja, Maj. Gen. Michael Ondoga, Maj. Gen. Geoffrey Muheesi  n’omuhandIiki w’entUura omu minisiture y’eby’obuhingi n’oburiisa Maj. Gen. David Kyomukama Kasura n’abandi baingi.

Ba General aba, ni bamwe aha baserukare barikurenga omuri 1,196 abarikuza kuhuumuzibwa omu kikoosi kya 12.

Kuruga ebiro 22.04.2022, amahe ga UPDF gatwire nigahandiika n’okushomesa abaserukare abarikwenda kuhuumura.

Beitu we Sejusa, owabaire ari omushugaanisa w’eby’obwa mbega omu ihanga, omurundi gw’okubanza kwenda kuhuumura kuruga omu mahe gukaba guri ebiro 03.12.1996.

Obwire obwe, Sejusa akashaba kuhuumura kuruga omu mahe arikugira ngu natiinisirizibwa n’okutuntuzibwa “ab’ekitebe kikuru ky’ekinyamahe narishi Military High Command”.

Beitu hoona, okushaba kwe tikurarabiremu nikwo kucwamu kuza omu kooti.

Aha biro 25.04.1997, kooti ejurirwamu eyabaire ekuriirwe omuhwezi w’ishabaramuzi obwire obwo, A.T. Manyindo n’abandi ba memba abaabeire barimu G. M. Okello. Mpagi Bahigeine, P. J. M Tabaro na Egonda Ntende bakahamya okushaba kwa Sejusa kuhuumura kuruga omu mahe.

Beitu hoona, okujaguza tikuramazire bwire buraingwa bwanyima y’omutonganirizi mukuru wa gavumenti kujuriza encwamu ya kooti y’ekinyamahe eyabeire eshagikire ekya Sejusa kuhumura.

Na bwanyima, okujuriza okwahairweyo omu kooti enkira zoona kukakorwaho kitaka kandi Sejusa akagaruzibwa omu mahe kuhisya 2016, obu atongozaho okwongyezayo omushango ogundi ogw’okuruga omu mahe.

Eriizooba, bwanyima y’emishango mingi omu kooti ey’okuruga omu mahe, okushaba kwa Sejusa kwarabamu.

#WestUpdates

LEAVE A REPLY