Bashatu baakwatiirwe okucupura ebihandiiko by’abashaho

730
0
SHARE

N’ebya Nagudi Fatumah

Pooriisi n’ab’ekitongore ekirikujunaanizibwa aha mutindo gw’eby’emibazi ekya National Drug Authority (NDA) baakwatsire abantu 3 ahabw’okuteekateekwaho kuba batwire nibacupura ebihandiiko by’abashaho.

Omugambirizi wa NDA, Abiaz Rwamwiri, arikworeka kimwe ahabihandiiko ebikwatsirwe PHOTO: Fatuma Nagudi

Aba bakwatsirwe bwanyima y’omuntu obeire agiire kugura eduuka erikuguza emibazi kushanga mukama waayo ayine ebihandiiko bigingiriire.

Ebihandiiko ebikwatsirwe ekitongore ekya National Drug Authority. PHOTO: Fatumah Nagudi

Abakwatsirwe ni Sande Duweni orikugambwa kuba aine ishomero ry’abashaho omuri Bushenyi, John Bobs Paul na Chris Akankwasa.

Okurugiirira aha mugambirizi wa NDA Abiaz Rwamwiri, okukwatwa kw’aba nikwijaho bwanyima y’okutunga okumanyisibwa kuruga aha muntu obeire agiire kugura eduuka y’emibazi nikwo kushanga mukama waayo aine ebihandiiko by’ebicupuri.

Rwamwiri naagira ngu eki kibagyemesereize kugyenda na pooriisi omuri Ishaka, Bushenyi ahi babakwatiire.

Aba bashangirwe n’ebihandiiko ebirimu eby’abeegi abarikushoma obushaho kuruga omumatendekyero gatarikushushana, amabaruha ga ofiisi za gavumenti, endanga-muntu, layisiinsi za NDA, za sitampu, kompyuta n’ebindi.

Endanga-muntu na za sitampu ebikwatsirwe PHOTO: Fatumah Nagudi

Abiaz nateerera abantu omuranga okwegyendesereza emyanya ei barikuguramu emibazi kandi naahamya ku barikuza kweyongyera n’ebikwekweto nk’ebi kureebeka ngu baajuna amagara g’abantu.

Omugambirizi wa poorisi y’ekyanga ekya Rwizi, Samson Kasasira, nayehanangiriza abantu kwongyera kutabaaza emishango nk’egi kuruga omumyanya endiijo ahabw’okuba t’eri Mbarara honka n’ahabw’okugira ngu wakozesa emibazi etahikire nebaasa kurwaza.

Aba hati nibarindirwa aha Poriisi ya Mbarara obwe okucondooza kurikugumizamu.

#WestUpdates

LEAVE A REPLY