Poorisi yarabura abarikwenda kutabangura obwa Omoro

318
0
SHARE

Pooriisi yaarabura abateezi b’akaruuru omu ishaaza erya Omoro obutagira emicwe mibi n’okuhenda ebiragiro omukusherura akaruuru k’omuny’ishengyero w’ishaaza ryabo omusya.

Omugambirizi wa pooriisi, Fred Enanga yaagira ngu okuronda akaruuru k’okutoorana omuny’ishengyero w’ishaaza rya Omoro kutandikire nyomwabazyo kandi nikuhwa ebiro 24/5/2022.

 “Ebikorwa by’okuvugisa ekimama, okutiina-tiniisa, okuhenda amaduuka g’abantu, okusherurira akaruuru omumwanya gumwe n’abetsimbire abandi, okubambuura ebyapa by’abetsimbire n’okureetaho obwimukyero titurikwija kubiikiriza nka pooriisi,” Enanga arikugamba.

Abantu 6 nibo barikuhaya-hayanira entebe y’omuny’ishengyero w’ishaaza rya Omoro.

Aba barimu Andrew Ojok Oulanyah owa NRM, Justine Odong Obiya (FDC), Oscar Kiiza (ANT), Simon Tolit Akecha (NUP), Eng. Odonga Terrence na Jimmy Walter Onen bombi abataine bibiina by’obutegyeki.

Okugarukamu akaruuru aka nikwijaho bwanyima y’okufa kw’obaire ari Omuny’ishengyero w’ishaaza eri, Jacob Oulanyah owafeereire omu irwariro Seattle, America ebiro 20/3/2022.

#WestUpdates

LEAVE A REPLY