Museveni abugaineho abakuru omu UPDF ahanshonga za Karamoja

231
0
SHARE

Museveni abugaineho abakuru omu UPDF ahanshonga za Karamoja

N’ebya David Lumu

Purezidenti Yoweri Museveni abugaineho abarikukurira eby’okwerinda omu eihanga kugaanira ahanshonga zitari zimwe na zimwe aharimu n’eby’okwerinda omukyanga ekya Karamoja.

Orukiiko rw’abakuru omu mahe g’eihanga aga UPDF rubeireho nyomwabazyo Orwakana, 14/4/2022 omumaka g’obwa Purezidenti omuri Entebbe.

Enshonga endijo ei bagambireho n’amahe ga UPDF agari omu Burigw-eizooba bwa DR Congo kurwanisa abahekyera ba ADF omu kikwekweto ekibariyo nibakora n’amahe ga Congo ekya Shujaa.

Orukiiko oru nirugambwa kuba rwetabiirwemu owabaireho minisita w’eby’okwerinda, Gen. Elly Tumwine hamwe n’omushuganisa wa puroguraamu ya Operation Wealth Creation, Gen. Caleb Akandwanaho a.k.a Salim Saleh n’abandi.

Orukiiko oru nirwijaho omubwire obu UPDF erikuhiiga abashuma b’ente abanyangarize ekyanga kya Karamoja omumatemba g’eihanga.

UPDF eyemereize okurisiiza amatungo omu iisiizo erya Kabobe omu disiturikiti ya Moroto, ekyanga ekirikuteekateekwa kuba nikishereka abashuma b’ente aba Turkana.

Amahe gatairwe omukyanga eki bwanyima y’okwitwa kw’abahangu omuby’obuhangwa 3 n’abaserukare 2 ababaire babakumire okwezi okuhwaire.

UPDF bakagiira ngu abantu 5 aba bakaitwa abashuma b’ente aba Turkana. Kwiha amahe ga UPDF gatongozoha ekikweto ky’okurwanisa abashuma b’ente ekya Usalama Kwa Wote omukyanga ekya Karamoja, abanyambundu 309 baitsirwe, embundu 184 zikwatsirwe kandi abanyambundu 1,792 bakwatsirwe kurugiirira ahamugambirizi w’amahe, Brig. Gen. Felix Kulayigye.

LEAVE A REPLY