#KabuyandaHealthCamp: Omubishushani!

897
0
SHARE

Andrew Tushabe, ISINGIRO

Enkuyanja y’abantu eriizooba baayeshuka omu tauni ya Kabuyanda kutunga obuheereza bw’okukyebeza n’okwebuuza ahandwara y’ekookoro y’omunwa gwa nyinenda, ey’amabeere hamwe n’akakooko ka siriimu.

Ekitongore eky’eby’amagara ekirikukora munonga ahamagara agakwatiraine n’okuzaara, nari shi Reproductive Health Uganda eitaagi erya Mbarara, Isingiro Health Centre 4 bakwataneise na TV West na Radio West kandi bashagikirwe gavumenti y’ebyanga eya disiturikiti ya Isingiro eriizooba baataho okukyebera endwara y’ekookoro y’omunwa gwa nyin’enda, amabeere, akakooko ka siriimu hamwe n’okwegyesa ahakubariirira oruzaaro omuhururu emanyirwe nka #KabuyandaHealthCamp.

Abantu barikurenga omuri 600 kuruga omumyanya etari emwe n’emwe omuri Isingiro nibo baahika omuri Kabuyanda kukyebeza n’okumanya oku amagara gaabo geemereire.

Abaingi omuri aba baaba bari abakazi b’ahagati y’emyaka 28 na 60 kandi hoona n’obu abakugu kuruga omu Reproductive Health Uganda baija bagyendereire kuha obuheereza ahari kansa y’omunwa gwa nyin’enda, amabeere hamwe n’ahakakooko ka siriimu; haine abandi abaaba baine n’endwara ezirikukira kureetwaho bukuru nk’okufa amaisho, okushaasha omugongo n’ezindi.

Okurugiirira ahari Collins Aturinda, orikukurira eirwariro erya Kabuyanda Health Center 4, haine abaishiki abarikuza omubushwere n’abarikuzaara bakiri bato, n’obu haraabe haijaho bakye munonga omuri abo.

Dr. Collins yaagira ngu, “Endwara ezi twakyebera aha obumwe nizireetwaho okuza omuby’omubonano omwishiki akiri muto munonga; nka kansa y’omunwa gwa nyinenda hamwe n’okureeta obubi omubicweka by’ekihama nangwa n’akakooko ka siriimu”.

Yayongyera yaagira ngu hoona ebizibu n’endwara ezirikurugamu nizibaasa kukorwaho zitakarengiire abantu nk’abo beitu baaba nibakyebeza obutoosha okumanya oku beemereire omumagara gaabo.

Ogu kandi yayongyera yasiima TV West, Radio West na Reproductive Health Uganda ahabw’okutaho ehururu egi agumize ngu baabahwera ahamwijurirano gw’abantu abarikuba bari ah’irwariro rya Kabuyanda barikusherura obuheereza kandi yaashaba omurimo nk’ogu ku guguma nigubaho haakiri buri meezi 3.

“Obumwe abarwaire ab’omubicweka ebya haihi tibarikuguubwa gye kukorwaho abashaho abu barikumanya. Mbwenu ku barikuhurira ehururu nk’egi bahurira baaruhuuka ahabw’okwija okw’abashaho abarikutaana ahari itwe,” nikwo Collins yaagira.

We Dr. Nathan Gonzaga orikwebembera ekitongore ekya Reproductive Health Uganda yaagira ngu eriizooba n’amazima haine abaine kansa y’omunwa gwa nyinenda beitu hoona yayongyera yaagira ngu, “abantu nibateganisibwa endwara nka ‘ulcers’, ‘pressure’ na shukaari kandi nibashaasha munonga.”

“Twagaruka twashanga ngu haine abakazi abaazaireho kandi barwaire amabeere. Kwonka kandi ekizibu eky’amaani ku barikushaasha ti barikuza mumarwariro kukyebeza n’okuraguza,” nikwo Dr. Gonzaga yaagira.

Dr. Gonzaga hoona nabwo yayongyera yaagira ngu abakazi bashemereire kureka okugira abashaija baingi, okureesa, okuzaara bakiri abaana bato, okuzaara abaana baingi munonga; nk’omuhanda gumwe gw’okwetantara ekookoro. “Kandi twatunga n’omugisha ahabw’abashaija kwija abaingi,” Dr. Gonzaga.

Ogu hoona yaashaba abakazi kuguma nibaza omumarwariro kusherura obuheereza bwanyima y’okuzaara eki yaayeta post-natal services.

Orikukurira eby’obutare omu Vision Group eitaagi erya Mbarara eririmu TV West na Radio West, Alex Mugarura yasiima abantu ba Isingiro ahabw’okuhurira omuranga gw’ehururu egi kandi bakaija omubwingi kandi yaagaruka yaaraganisa ku barikwija kutaho ehururu endiijo omubwire bwa haihi kuheereza n’abo abataabaasa kwija eriizooba

#WestUpdates

LEAVE A REPLY