Ow’emyaka 100 ateire omukundwa we empeta

395
0
SHARE

N’ebya Timothy Mushabe, KITAGWENDA

Bwanyima y’okugaitwa ahamyaka 102, Justus Rushegyere tayikiriziine n’enteekateeka ezirikugira ngu hariho obu obwire bw’okushwera burikuba bwarengire.

Rushegyere agaitsirwe n’omurigirwa we Prisca Kefeeza, 80, nyomwebazyo Orwamukaaga 19.03.2022 omumaka gaabo omuri Musunga, waadi eya Bunena, Tauni Kanso ya Kabujogera omu disiturikiti ya Kitagwenda.

Okugaitwa oku kwebembeirwe Ven. Rev. Alex Arinaitwe ow’obusabadiikoni obwa Ntuntu.

Ababiri aba batwire hamwe kumara emyaka 65 batakagaitwa ga. Bwanyima y’emyaka egi yoona Rushegyere nikwo kucwamu ku Prisca niwe muntu atyo nikwo kumushaba, ahakutandika kwa wiiki egi, ku baza kumwe omubushwere oburikwera.

Ahabugyenyi obubaire butaine nshagarizi, babandize n’okuteera ebirahiro kandi bwanyima y’okugaitwa n’okushaba, abakamwana n’abahara nibo bakozire ogw’okuzinira omugaati barikujaguza rukundo ahabw’izooba eri bagizire ngu ribaire riri ery’omutaano eri batwire barinzire.


Barikugamba ahamukoro gwabo, bagizire ngu eki kibaireho ahabw’okuba babeire batarikwenda kufeera omukibi.

Abaijukuru nibo batebeekaniise omukoro ogu. Joan Atukwase na Eliab Byabachwezi, bamwe omubaijukuru bagizire ngu batebeekaniise omukoro gwa ishenkuru-bo gw’okugaitwa omu wiiki emwe.

Ven. Rev. Arinaitwe ogaitsire abagore aba naagira ngu ky’okurekyera kimwe n’obwo okyererwa.

“Ruhanga takyerererwa kandi atuura aine oku atebeekanisiize abantu. Buri kintu eki arikutebeekanisa, naakihikiiriza omubwire bwakyo. Ahamyaka 102, Mzee Justus yakihikiiriza,”Arinaitwe nikwo ayongyeireho.

#WestUpdates
#Marriage
#GoldenLove

LEAVE A REPLY