Mwongyere kushomesa abahingi n’abariisa – Maggie Kigozi

398
0
SHARE

N’ebya Eddie Ssejjoba

Maggie Kigozi,  omwe omubahingi rurangaanwa yaashaba gavumenti kuhamya akakwate k’eby’oby’obushuubuzi aku eihanga rya Uganda riine omumahanga ga Burugwa-izooba bwa Africa (East Africa) kubaasisa abahingi n’abariisa kwanguhirwa okutunga obutare bw’eby’emishuuburo yaabo.

Maggie yaagira ngu abariisa b’enkoko batwire nibatunga obuzibu omukutunga obutare ahabw’ebiragiro ebiteirweho amahanga agatwehinguririize. Kigozi owaagira ngu nawe n’omuriisa w’enkoko yaaba ari omwe ahari abo abaaza omumushomo gw’eriizooba Orwakataano 18.03.2022 ahamworeko gw’eby’obuhingi n’oburiisa omukishaayi Kololo. Abantu abaahika ahamworeko hamwe n’omumushomo yaaba ari, Esther Mbayo, owaabeireho Minisita w’enshonga z’obwa Purezidenti.  Kigozi yaagira ngu abahingi n’abariisa nibetomboitwa ahabw’emihendo y’ahansi ey’amahuri hamwe n’enkoko z’enyama n’obu emihingo y’akeshereko ka COVID19 yaihirweho.

Ogu yayongyera yaagira ngu aba bakasharuka munonga bwanyima y’ebiivuru by’ekiro kukingwaho ahabw’okugira ngu abarikuba nibakyakara nibagura enkoko. Beitu ngu hoona n’obu okukora ekiro n’obu kuraabe kugarukireho, emihendo y’eby’okurya by’enkoko egarukire yatemba. Kandi ngu hoona nabwo abariisa bariyo nibafukaana n’endwara z’enkoko ezitari zimwe na zimwe.

Ogu yayongyera yayebaza Vision Group kutebeekanisa abatendeki kandi hoona abaabashomesa. “Twabaasa kwega bingi. Nitusiima Vision Group ahabw’okukora eki,” nikwo yaagira. Yaagumizamu, agumize ngu Uganda eine eitaka rirungi hamwe n’embeera nungi y’obwire beitu abahingi tibakeegyesiibwe. Yahendera arikushaba gavumenti kwegyera ahamahanga agandi reeru bakataho emishomo mingi kwegyesa abahingi n’abariisa

#ObuhingiNoburiisa
#WestUpdates

LEAVE A REPLY