Eminyeto bahigirwe kutwarizana gye n’okuheerezana ekitiinisa

285
0
SHARE

Andrew Tushabe, MBARARA

Okweyongyera kw’emihondano omu maka obwo abashaija n’abakazi barikurwana bakaitana obwa hati nikugambwa kuba nikureetwaho abashaija kuremwa kwikirizana n’emituurire eizire, ahi abakazi bashemereire kuba bari abahwezi kandi batari abo abarikukorera ahansi y’ekiragiro ky’abashaija omu maka.

Eki kigambirwe Edgar Buryahika Kavindi, orikukurira ekitongore ekirikwenegyeza obusingye n’entunguuka omu minyeeto omu ihanga ekirikumanywa nka Youth for Peace and Development Uganda – YOPEDU. Arikushomesa aha nshonga y’okureetaaho entuura y’obusingye, ah’izooba ry’okukuza ekiro ky’abakazi ahari St. Peter’s SS Katukuru, Edgar agizire ngu, “abakazi batungire obwegyese kuruga omu mashomero hamwe n’okurabira omu mihanda endiijo nk’emishomo batungire okumurikirwa aha bugabe bwabo.

Beitu hoona, abashaija abamwe bakiri omu nkora eya ira, obu abakazi baabeire batakamurikiirwe. Ababiri ku barikwegaita kukora amaka, emihondano obwire obwingi terikubaasa kwetantarwa”

Kandi aha niho Edgar ahigiire abeegi kutandika kuheerezana ekitiinisa batarikugyenderera aha kikura kyabo nk’abantu kandi tibashemereire kwega emicwe ey’ira ey’okutuntuza n’okutwariza kubi abakazi agumize ngu eki nikiija kureetaho okutuurana okw’obusingye.

Omumushomo ogu, Adella Mbabazi, nawe omwe ahab’ekitongore eki ahwereire eminyeeto kwetegyereza entaaniso eri omu myoga y’abantu kurugiirira aha kikura kyabo kandi yaabahiga kufayo munonga kureeba ngu okwetegyereza oku kwaza omu mikorere yaabo ey’obutoosha.

Omu kwegyesa oku, aboojo bahairwe otwenda otu abaishiki barikwejunisa baaba bari omu micwe nk’eky’okwegyeraho okweyihamu emize y’okutuntuza n’okutwariza kubi abakazi, ekintu ekirikubeegyesa ngu abantu bahangirwe omu miringo etarikushushana kwonka nikirungi kutuurana buri omwe arikuha mutaahi we ekitiinisa.

#WestUpdates
#Youth #DomesticViolence #GenderBasedViolence

LEAVE A REPLY