Aba Bujaga bashangire eishomero nirigyezaho kuhimbuuka

458
0
SHARE

N’ebya Christopher Ahimbisibwe

N’obu kiraabe ngu Gavumenti ya Uganda ekaikiriza abantu-buntu nabo kutandikaho amashomero agaabo nk’omuringo gumwe gw’okutunguura eby’obwegyese, eki kikareetera amashomero  maingi agaabeire gari ag’amaani omumyaka eya kare kandi gari aha musingye gw’ekanisa obwo garikuhwerwaho Gavumenti, gaagwa!

Bujaga SSS obwa hati eririkumanywa nka Laki High School – Bujaga erikushangwa omuri Rwamapara kandi eryatandikire omubutware bwa Ida Amin omu gwa 1977, ni rimwe omumashomero agaabeire nigashomesa abaana b’aboojo agaabaire gari agamani omuri Burengyerwa-eizooba. Kwonka ahu turikugambira ebi, amaani agu eishomero ryabeire riine nangwa riri kurangaanwa omu myaka eya kare, kikasigara kiri ekitebyo ky’abo abashomeireyo.

Kumanya ngu embeera y’eishomero ekahinduka, yaahika n’aha kwerarikiriza abo ababeire bari aha bukiiko bw’eishomero, bakacwamu okuhindura eishomero kuruga omu kushomesa aboojo bonka bahendera barikurihindura ery’aboojo n’abaishiki nk’omuringo gumwe ogwakureetera eishomero ryagira abaana baingi.

N’obu ebi byakozirwe tibirareeteire eishomero kutunguuka ninga kwongyera aha mubaaro gw’abaana ahabw’enshonga ezabaire ziri omu beebembezi b’eishomero. Eki nikyo kireeteire abaashomeireyo kutandika kwerundaana bakatandika kusherura amagyezi agarikureetera eishomero ryabo ryagaruza ekitiinisa hamwe n’amaani agu ryabaire riine omu myaka ya kare.

Abo, beebembirwe RCC wa Masaka City, Steven Asiimwe, hamwe n’abandi abarimu orikwebembera eishomero rya Mbarara High School, Ham Ahimbisibwe, Laban Kanywa, ori omukama wa Global High School, Ntare Denis orikwebembera amashomero agari omururembo Mbarara hamwe n’abandi beeteeranire ahishomero kubaasa kuhajaana omuringo ogu bakubaasa kugaruzaho eishomero eryabareeteire baaba ab’amaani. Aba babandize n’okutambura n’abandi omu tauni eya Buteeraniro hamwe na Nyeihanga nk’akamanyiso karikworeka ngu eishomero rikiine amaani.

Barikurambura eishomero, obwo beebembeirwe Mpiriirwe Moses Nzaaro ori mukuru w’eishomero kandi nawe owashomeire omu ishomero niryo rimwe, bashangire oku eishomero ririyo nirigyezaho kuhimbuuka bwanyima y’okureeba entuguuka ei mukuru w’eishomero ariyo nareeta. Bishop owahuumwire Dr George Tibesigwa omwe omu bagambi bakuru, agizire ngu ekiriyo nikiita amashomero na munonga agaatandikirwe aha musingye gw’ekanisa kandi garikuhwerwaho Gavumenti, n’ahabw’okushanga ngu abarikuba bashomeireyo tibarikwenda kugaruka enyima kureeba ahi baarugire.

Nikwo kusiima abo boona abaashomeireyo ahabw’okureeba ngu nibafayo kugaruka enyima bakashagika amashomero gaabo.

#WestUpdates

LEAVE A REPLY