IGG kushwijuma obugaiga bw’abakuru omu gavumenti

242
0
SHARE

Kariisho-riisho wa Gavumenti, Beti Kamya atandikire okushwijuma eby’obugaiga bwa bamwe ahabakuru omu gavumenti 160

Kamya agambire abanyamakuru ahari Uganda Media Centre nyomwabazyo ngu bagyendereire abakuru 37 kuruga omu ofiisi ya IGG, abahandiki bakuru abarikujunanwa ahabw’obururu 53 bwa gavumenti ya rwagati, ba diisi 30 ba disiturikiti ezaine embaririra y’ahaiguru, tauni kiraaki 10 kuruga omu gavumenti z’ebyanga ezetauni ezirikukizayo embaririra n’abarikukurira eby’esente omu bitongore 30 bya gavumenti ebirikukiza embaririra.

Ogu agiizire ngu omurimo gw’okushwijuma nigwaija kutwara ameezi 4 kwiha Okwakabiri kuhisya Okwamukaaga 2022.

“Nitwija kutandika n’abantu aba ahabw’okugira nibo barikujunanwa n’eby’obugaiga n’esente. Tihaine ou turiyo niturwanisa beitu nitukuratira eiteka ry’obwebembezi eryahinguzibwe Ishengyero,” Kamya arikugamba.

Kariisho-riisho agiizire ngu eki bariyo nibakikora ahabw’abakozi ba gavumenti n’abeebembezi b’obutegyeki abayanjwiire bimwe ahabintu ebi baine omu mwanya gw’okwanjura eby’obugaiga bwaabo byona ebibaine.

Okushwijuma oku tikwirikwija kureeba ahaby’obugaiga by’abakuru aba bonka beitu n’obugaiga bw’abanyabuzare kumanya ahu entaasya yaabo erikuruga.

Ahansi y’eiteka erya ‘Leadership Code Act’ eryahinguziibwe omumwaka 2021, omuntu yaaheeza kutooranwa nk’omwebembezi ninga omukozi wa gavumenti, ashemereire kwanjura eby’obugaiga bwe omu meezi 3 bwanyima y’okuheebwa ofiisi egyo.

Na bwanyima, omwebembezi ogu ashemereire kuhayo omushaara n’eby’obugaiga bwe buri myaka 2 omukweezi kwakashatu kandi bo abakozi ba gavumenti buri myaka 5 omukweezi kwakana.

LEAVE A REPLY