‘Mwetebeekanise kupakasa omumpaka za motoka’ – MP Rukaari

482
0
SHARE

N’ebya Aloysius Byamukama

Hahweireho emyaka 2 kuruga obu eihanga ryemereza emwe ahamirimo yaaryo bwanyima y’okubarukaho kw’endwara ya COVID19 kandi hoona ekyarugiriiremu okuza omukeeshereko.

Abashuubuzi abaingi na munonga abarikukorera ahabiivuru, emikoro hamwe n’emizaano obwo barikuguza ebintu bitari bimwe na bimwe batwire beefumbatsi bwanyima y’emirimo yaabo kuzingama ahabw’okugira ngu emikoro nk’egi ekaba ezibiirwe.  

Endwara egi etakaizire, eby’emizaano ebibaire nibibaho omubicweka  bitari bimwe na bimwe omunsi yoona bibeire nibiheereza abantu empiiha omumyanya ei bibeire nibikorerwamu. Gumwe omumyanya egi obwa hati ni omumwanya ogurimu enyanja ya Lake Mburo ogu abavugi b’empaka eza raare ya Rukaari-Lake Mburo barikuza kuba barimu.

Abashuubuzi omukyanga eki nibaija kukoresa akagisha aka kugaruka omunteebeekanisa zaabo kushuubura, empaka z’emotoka eza Rukaari-Lake Mburo Mbarara ku ziraabeho ahakuhendera kwa wiiki egi omumyanya ya Mbarara na Kiruhura omuri Burengyerwa-izooba bwa Uganda.  

Abahagizi b’empaka z’emotoka bari omunyiriri kugura ebyokura omumpaka za Rukaari – Lake Mburo ez’omwaka 2020. PHOTO: ALOYSIUS BYAMUKAMA

Abantu abaine obuheereza bw’eby’obushuubuzi obutari bumwe na bumwe kuruga ahabaine amahoteeri, kuza ahari abo abakutamuza ebikoijo beetebeekaniise kutunga akasente karinganiire buzima.

Robert Mwesigwa Rukaari, orikuta sente omumpaka ezi, ahabwire abatuura b’omumyanya egi ahamiringo ei barikubaasa kukoramu sente, agumize ngu emikoro nk’egyo teshemereire kuba ey’okushemerererwamu kwonka eshemereire kuba neerekyera sente abantu abaine enteekateeka y’okupakasa beitu obwo baaba nibakuratira ebiragiro by’okwekingira endwara ya COVID19.

“Omuzaano gw’emotoka z’empaka nkagukuratira kuruga omubuto kandi ningukunda kuhisya n’aharurengo rw’okukwatsibwa omwaka ogurikwija naanye nkazivuga. Empaka ezi niziijaho omubwire  obu abantu baitu barikwetaagiramu sente kandi itwe nk’abantu ba Burengyerwa-izooba tushemereire kuranzya hare kukira ahakushemererwa reeru tukorese akaire ako kukoresa sentem,” Rukaari nikwo agizire.

Omushuubuzi arikuguza ebintu bitari bimwe na bimwe omumpaka za Rukaari – Lake Mburo ez’omwaka ogwa 2020. PHOTO: ALOYSIUS BYAMUKAMA

Omururembo Mbarara, abantu abarikuha obuheereza bw’oburaaro, ebyokurya, ebyokunywa n’entambura na munonga aba Boda Boda bamazire ebiro 3 barikuheereza bw’entambura kandi nibareebeka kuba beeteekateekire kukora bwanyima ya gavumenti kwigura emirimo.

“Eki ni kirungi na munonga omubwire obu turiyo nituruga omukaire k’okukinga eby’emishuuburo kumara emyaka 2 bitari kukora. Aka n’akagisha k’okugaruka eruguru,” Moses Byamugisha, orikuguza Chapatti omururembo Mbarara nikwo agizire.

Omwaka oguhwaire, obuheereza bw’oburaaro bubeire nibwetaagwa munonga ahakiro ky’okubanza eky’empaka ezaamazire ebiro 3, bwanyima y’abaahikire omururembo bakyerereirwe kugyemeserezibwa kuza aheeru ya Mbarara n’ebicweka ebyehinguririize barikusherura oburaaro.

Ekizibu ky’eibura ry’amajuta.

Abandi bantu baine amatsiko kukora sente omukuguza emishuuburo nk’ebyokunywa n’ebyokurya ahamihada ei motoka z’empaka ziraabe niirabamu, kandi n’abarikuha obuheereza bw’entambura obwa Boda boda na motoka z’abashabaazi aharuguuto nyeigyendwa orwa Mbarara-Masaka ahagati ya Sanga na Biharwe.

Beitu hoona ahi bwaza kuhikira orwakashatu eriizooba, gamwe omumacundiro g’amajuta gabaire gatakiine majuta kandi abo abagaine nibagaguza ahagati ya shiringi 4,900 na shiringi 6,000 omuri Mbarara.

Eki nikibaasa kureetaho ekizibu ky’ebishare by’entambura obwo birikweyongyerera kimwe, amajuta gaagumizamu gabuzire kuhisya ah’izooba ry’empaka

David Matsiko orikukora Takisi omururembo Mbarara naagira ngu eibura ry’amajuta eriteire eihanga ryona, niriija kuremesa eby’obushuubuzi beitu hoona agaruka agira ngu abahagizi b’empaka ezi nibaija kuba beetebeekaniise kushashura ebishare ebi kuza Kiruhura omumpaka.

“N’eky’omugisha mubi kureeba ngu tutungire ekizibu ky’amajuta g’ebiiruka kwonka twine amatsiko kugira ngu abahagizi nibaija kuza omumpaka ezi ahakuvuga okw’omutaano kandi aho nitubaasa kukoraho akasente,” Matsiko nikwo agizire.

Eizooba ry’empaka ery’okubanza aharwamukaaga oru, abavugi nibaija nibavuga orurengo rw’okubanza barikuruga Kakoba barikuza Sanga, ahi barikuza kuruga reeru bakaza kuvugira aharurengo orw’omutaano ahari Mwesigwa Resort omuri Kibega Sanga reeru bahendere eizooba ry’ahamuheru erya Sande barikuvugira omubicweka mukaaga ahi ebicweka bibiri omuri ebi byetsirwe Pole Pole na Charles Muhangi, abavugi babiri ababeire bari omukibiina ky’abavugi b’emotoka z’empaka ekya Mbarara kandi abaarugire omumagara g’ensi egi kandi na bwanyima habeho n’okugaba ebiconco aha Lake View Hotel omururembo Mbarara. #WestSports

LEAVE A REPLY