Bp. Bagamuhunda yaajumirira emicwe y’obushambani omuminyeto

398
0
SHARE


N’ebya Job Namanya Apuuli omuri Kabale

Bishopu w’obureeberezi bwa Kigezi, Eng. George Bagamuhunda, yaajumiirira emize y’ebikorwa by’obushambani ebyeyongyeire omu Uganda ariigyenda.

Bagamuhunda yaagira ngu ebi kandi nabwo byongyesereize ahamubaro gw’abaishiki bato abarikuguma nibakanya bwakyeire bwaizire agumize ngu hoona haaba hataine ekikozirweho, eihanga niriija kuza omubuzibu bw’amaani omubantu baaryo.

Amakuru nigooreka ku ekyanga ekya Kigezi omumashuuma ga Burengyerwa-izooba bwa Uganda kitungire abaishiki bato abarikutwara enda barikurenga omuri 6,000 omubwire obu eihanga rimazire rikingire oteiremu n’amashomero omukugyezaho kukingira okujanjaara kw’endwara ya #COVID19

“Hariho ekyetengo ky’okurinda abaana baitu abato kwenda ngu betantare emicwe y’okuza omubikorwa y’eby’omubonano kandi bangire kimwe ebintu bya busha. Abaishiki abaingi bafeereirwe emigisha mingi obwo barikwekwata eijaga. Abamwe batwaire enda kandi abamwe bafiire,” Bagamuhunda nikwo yaagira omubutumwa bwe bw’ebiro bikuru n’okuhendera omwaka.

Omubutumwa obwaheebwayo omu ofiisi ya Bishopu ahakashozi ka Rugarama omururembo Kabale, Bagamuhunda yaashaba abaishemwe kukoresa amagara gaabo g’omunsi okugaganyirwa obwo barikureka emicwe y’omubi sitaani.

“Abaishemwe bashemereire kwetantara okushisha obwire, amaani hamwe n’eby’obugaiga byabo barikubita omukunywa amaarwa. Eminyeto bashemereire kugyezaho nk’oku kirikubaasika betantare okukoresa emibazi y’ebitokooza-bwongo nk’amairungi ebirikushiisha emibiri yaabo hamwe na nyensya yaabo,” nikwo Bagamuhunda yayongyeraho.

Ahakikwatiraine n’eby’okwiguraho amashomero, Bagamuhunda yaashaba boona abu kirikukwataho omuby’obwegyese kureebeka ngu baakoresa amaani reeru abeegi babaase kushumbuusha obwire bwabo obu baafeereirwe.

“Hashemereire kwongyerwamu amaani agorekyereire okwinegyeza okwegyesa hamwe n’okwega. Boona abarikukwatwaho baine kutamu amaani n’omujinya kwenda ngu abaana batungye buri kimwe ekirikwetaagisa kutunga okwegyesibwa kurungi,” nikwo arikwongyeraho atyo.

Bishopu kandi hoona nabwo yashaba abebembezi b’ediini kureebeka ngu baarinda amataka g’ekanisa obwo barikugatungira ebyapa.

#WestUpdates

LEAVE A REPLY