Judo batooraine Purezidenti kwebembera mpaka emyaka 4

300
0
SHARE

N’ebya Silvano Kibuuka       

Ekibiina ekirikukurira omuzaano gwa Judo omu ihanga ekya Uganda Judo Association kitooraine obaire ari omwebembezi w’akaanya-bwanya, Capt. Herbert Musiitwa kuba Purezidenti w’ekibiina eki kandi akebembera omuzaano kumara emyaka 4.

Omurukiiko rw’okuteeza akaruuru ahari Buganda Royal Institute aharwamukaaga, abarikuteeza abajwekyerwa kuruga omu kiraabu 15 bateereire owabeireho omuvugi w’enyonyi Musiitwa kuruga omu Entebbe Judo Club kandi baamurabyaho ataine kihakanisa.

Okurugiirira ahangyenderwaho ei baherize kutereezamu, purezidenti naatorana ba memba kandi ogu, aho n’aho atooraine Jasper Aligawesa nk’omuhwezi wa purezidenti omubw’obwebembezi kandi yaatoorana George Ssekiwunga nk’omuhwezi wa Purezidenti omunshonga z’okutendeka abazaani.

Aligawesa naaruga omuri Luwero Judo Club kandi Ssekiwunga naaruga omuri Smart Kigwo Judo Club.

Abandi abatoorainwe ni Derrick Ntege nk’omuhandiiki mukuru obwo Bosco Masiko ari omuhwezi we.

Haji Jamil Ssebalu omugambirizi w’eby’empiiha omu Vision Group niwe mubiiki, Rachael Babirye naija kuba najwekyera abakyara kandi Isaac Onek naija kubanajwekyera abazaani.

Musiitwa ashabire kiraabu zooba ezirikwenda kwegaita omumuzaano kuhikiiriza byona ebirikwetaagisa reeru nikow babarwe omurukiiko orurikukurataho.

“Omuzaano gwa Judo gutwireho kumara emyaka 10 kwonka gubaire niguzaanirwa nk’okwo omunshonda. Akakiiko k’akaanya bwanya aku mbaire ninyebembera, kakaiguraho enyigi z’omuzaano kwenda abantu bagureebe bagumanye kandi gavumenti hati eyikiriize enshonga y’omuzaano kugira akakiiko akasya,” Musiitwa nikwo arikugira.

Aligawesa agizire kuruga abantu ba Judo bamushaba obuhwezi n’obuheereza bwe, abeire naaha obuhabuzi nka memba kwonka hati n’obujunaanizibwa bwe kwebembera omuzaano ogu.

“Ekigyendererwa ky’okubanza n’okutaho enteekateeka eshorongire kurungi n’ebibiina by’ekizinga kya Africa hamwe n’omunsi yoona kandi bareebekye ngu Uganda nayo yaaza omumpaka ez’amahanga agaategyekirweho abangyereza eza Birmingham Commonwealth Games n’eza ekizinga kya Africa eza All Africa Games omwaka ogurikwija,” Aligawesa nikwo agizire.

#WestUpdates

LEAVE A REPLY