Tiimu y’eihanga eya Taekwondo etoorainwe

165
0
SHARE

N’ebya Silvano Kibuuka

Ekibiina ekirikwebembera omuzaano gwa Taekwondo omu Uganda obwa hati, kyaherize omurimo gwakyo ogw’amaani ogw’okutoorana tiimu erikujwekyera eihanga kandi hoona tiimu etwaire etariho kumara emyaka 4 ahabw’emihondano omubwebembezi bw’ekibiina eki.

Tiimu erimu abashaija 28 n’abakazi 27 erangirwe bwanyima y’ameezi 2 barikusherura abazaani kuruga omubyanga 5 by’eihanga ebya Buganda, Lango, Acholi, Burengyerwa-izooba na Bugwa-izooba.

Okutoorana abazaani aba kukatandika omukwezi kw’ikumi kurikutandika.

Ekyanga ekya Buganda nikyo kyasingireyo omutindo obwo barikutungamu abasinguzi 14 omubashaija n’abakazi.

Abazaani bari omundengo 7 kandi nibaija kuba nibazaanira eihanga omumizaano eraabe eri omuri Kenya omu wiiki 3 ezirikugarukaho.

Omutendeki wa tiimu y’ihanga, Mark Ogwang, naagira ngu nibaija kweta abo boona abasingwire omuri rurengo kwija kwegaita omunkambi emwe obwo barikutooranamu tiimu eraaze omuri Kenya kujwekyera.

“Twine amashemererwa ahabw’okushanga ngu twegaitsirweho abazaani abandi 5. Kandi ekindi tutungire abazaani ab’orurengo orwa Heavy Weight, abashaija n’abakazi, kandi hoona abu tutwire tutaine kumara obwire buraingwa,” nikwo Ogwang arikugira.

Omwebembezi w’akaanya-bwanya ow’ekibiina eki, Marvin Baryaruha aine amatsiko ngu emirimo yaabo eriyo neegyendera omubwire.

“Buri kimwe kiriho nikitamburira omubwire kandi twetooroire eihanga ryona turikusherura abazaani abarikukizayo oburungi abaagiire omumpaka ez’aharurengo rw’ekyanga ky’eihanga n’emizaano erikubabaasisa kuza aharurengo rw’eihanga. Tukataho n’omushomo gw’abashazi b’empaka ogw’okweyijusya kumara ebiro 2 tutakagiire omumizaano yaabo abarikuza aha tiimu y’ihanga kubashomesa n’ababiragiro ebisya. Obwa hati nitureeba ahampaka ezirikuba ziri omuri Kenya nk’omurimo gwaitu gw’okubanza kukora aharurengo rw’eihanga,” nikwo Baryaruha arikugira.   

Omuhwezi wa Purezidenti w’ekibiina ky’omuzaano gwa Taekwondo omu ihanga Ismail Bbumba ashabire abasinguzi ku bareka kuza omukahuumuro ahabw’okuba baine kuza omumpaka zz’okutooranwa kuza ahatiimu y’abantu 8 abarikuza Kenya hamwe n’omumizaano y’ekyanga kya Bugwa-izooba bwa Africa erikuza kuhindira omuri Rwanda omwaka ogurikwija omukwezi kwa kabiri

“Ninyebaza abazaani boona abagiire omumpaka ezi, abatendeki, abashazi b’wmpaka ezi hamwe n’abasinguzi. Omusinguzi tashemereire kusingura omurundi gumwe kwureka ashemereire kugumizamu nasingura. Turi abantu b’amaani ahakirwa kya Africa kandi ninkurusya n’abo abaasingwire emidaari omumpaka eza Korean Ambassador Championship ezaakoreirwe ahamikutu ahabw’endwara ya #COVID19. Mugume n’emicwe nk’oku omuzaano gurikubashaba,” Bbumba ashabire abazaani

Kandi hoona agarukire yaabaijusya kwehandiikisa obwire butakahweireyo obwa ebiro 30.11.2021

We omujwekyerwa omu ishengyero ahabw’ishaza erya Agago, Hon Beatrice Alok, asiimire abagiire omumpaka ezi kandi yayongyera yaabaraganisa ku arikwija kubashabira enyongyeza ya sente omuby’emizaano omu ishengyero ahabw’okuba naashutama ahakakiiko k’eby’obwegyese neby’emizaano omu ishengyero.

#WestSports

LEAVE A REPLY