Gavumenti eyihe omushoro ahaby’emizaano – Uhuru

164
0
SHARE

N’ebya Fred Kisekka

Salim Uhuru, orikwebembera akakiiko k’ekibiina ekirikukurira omuzaano gw’ebikonde (Uganda Professional Boxing Commission) ashabire gavumenti kwiha emishoro ahaby’emizaano nk’omuringo gumwe nkureeta abantu abarikuta sente omuby’emizaano

Uhuru kandi hoona ori Meeya wa diviijoni eya Kampala Central naagira abo abarikuba nibenda kuta empiiha omuby’emizaano babirugireho ahabw’omushoro mwingi ogurikuteebwa omubikoresa by’eby’emizaano ebirikuba nibitaaha omu ihanga ekintu ekirikuremesa entunguuka omuby’emizaano.

Uhuru eki akigambire obu abeire nayiguraho ekishaayi ekisya eky’okuzaaniramu omuzaano gw’ebikonde (Boxing Ring) ahari Old Kampala ekya Big Fight Night kandi hoona ekiherizeho obukaikuru burikuhika 60.

“Ninshaba gavumenti kwiha emishoro ahaby’emizaano. Twaza omuby’obushuubuzi, eby’emizaano tihaine ahi byahikire kandi abo abarikuba nibatamu sente tibarikwihamu magoba. Ahabw’enshonga egi twine ekyetengo ky’okwihaho emishoro na munonga ahaby’amaguzi ebirikuruga aheeru kwenda ngu kyanguhire abarikutamu sente kutaho entunguuka,” nikwo Uhuru agizire.

Ayoongyeire yaagira ngu, “Eky’okureeberaho, tikirabeire ky’oburingaaniza orikukurira kiraabu ya Vipers Lawrence Mulindwa kushashura emishoro obu yaabeire nagura ebintu aheeru y’ihanga obwo arikwombeka ekishaayi kya St. Mary’s eki obwa hati eihanga ryona ririyo niriganyirwamu. Ekishaayi eki hati nikyo kiine omutindo gw’okuzaanirwamu empiira y’amahanga oteiremu n’egyo eya Uganda.” Ogu naagira ngu ebintu by’eby’emizaano byonka nibitiinisa bamwe ahabashuubuzi kuta sente zaabo omumizaano, n’ahabw’ekyo gavumenti eshemereire kubacweraho ekabaiha ahamishoro.

LEAVE A REPLY