Ab’obugaari nibenda UNRA kubaha omwanya ahanguuto

310
0
SHARE

N’ebya Silvano Kibuuka

Abavugi b’obugaari omu Uganda barikurabira omukibiina ekitari kya gavumenti ekirikumanywa nka Critical mass baayegaita ahari bataahi baabo omururembo orwa United Kingdom hamwe n’omundeebo ezindi omuri Buraaya kuvuga obugaari ahabw’omwete gw’oruteerane orugyendereire kutaho empinduka ahambeera y’obwire oruriho nirugyenda omumaisho omururembo Glasgow omuri Scotland

Okuvuga obugaari okw’omururembo orwa Kampala obwo barikukoresa ehururu ya ‘Changa Gaali’ etebeekanisiibwe aba Critical Mass bakwataneise na Uganda Cycling Association hamwe na Ultimate Group obwo bagumize ngu “Ekyoma eki nikihindura embeera y’obwire”

Okuvuga orugyendo rwa kiromita 5 oku kwareetera abavugi barikurenga omuri 60 baaza omumpaka ezi oteiremu abo abarikuvuga omumpaka hamwe n’abo abarikuvuga kushemererwa kandi kwatandikira ahari Independence Monument kuza ahakishaayi ekya Kololo

Omushugaanisa omukitongore ekya Critical Mass, Andrew Mukembo bwanyima y’okuvuga oku yaagira ngu baayegaita n’amagana g’abavugi b’obugaari omuntebeekanisa akozirwe Cycling UK kuruga omundembo zitari zimwe na zimwe omuri Buraaya kuza Glasgow kumanyisa abebembezi b’ensi yoona ku akagaari kari ak’omugasho gw’amaani omukutereeza embeera y’obwire omunsi yoona.

“Nitwenda ngu abavugi b’obuaari nabob abate omuntensagana ahabw’omugasho ogu bainiire omwete ogu. Okuvuga nikukyendeeza obutwa oburikuruga omubiiruka ebirikukoresa amajuta omunsi yoona. Nikukyendeeza omwijurirano gw’ebiiruka omunguuto kandi ku harikuba hariho embeera ezirikwetaagisa obuhwezi nikyanguhira ebitongore ebirikukwatwaho nka poorisi hamwe n’ab’eby’amagara ebiiruka ebirikukoresa amajuta ku birikukyendeera aharuguuto kandi eby’obuhangwa nibigaruka busya na munonga omuby’oburambuzi n’ebindi,” nikwo Mukembo arikugira.

Yaagira ngu gavumenti, erikurabira omu ishengyero, ekitongore ky’eby’emirimo, eby’enguuto hamwe n’abandi abarikukwatwaho bashemereire kuhigiza omwete ogu kandi bakainegyeza okuvuga obugaari omu Uganda obwo barikwongyera ahamutindo n’omubaro gw’obumanyiso bw’ahanguuto

“Nitwetaaga abarikubaga ebiragiro kutaho enguuto ezirikuha emigisha abo abarikuvuga obugaari ahabw’okuba obwa hati amaani bagateire ahari abo abarikuvuga amamotoka na za piki. Omundembo ezindi, enshonga egi baatandikire kugireebamu. Ku orikureeba abantu abarikutambura barikuza kukora n’abarikurugayo ahamguuto ny’eigyendwa, obu nibwo bwire ou gavumenti eshemereire kuba netandikiraho kuteera puraani z’enguuto ezirikubaasikira abavugi b’obugaari. Ahabw’enguuto zifunzire baingi nibatomerwa motoka bahendera barugire ahaby’okuvuga obugaari,” nikwo Mukembo arikwongyeraho.

Teddy Awori, orikukurira ekitongore kya Critical Mass omuri Kampala ngu okuvuga obugaari kwine omugasho ogurikukira ahakurinda eby’obuhangwa kandi yaahiga amashomero kuta omuzaano ogu ahaneteebeekanisa ei barikushomesezaho amashomo gaabo

“Okuvuga obugaari ni kurungi omubiro by’omumaisho ahabw’abaana kandi abo abarikubaasa kukugumizamu nikubaasa kubakorera sente nyamwingi. Nikwombeka eihanga ahabw’okuba abarikukoresa obugaari nibaba niburanga omu ihanga hamwe n’okuguza ebyoma byabwo ku barikuba nibakanika,” nikwo Teddy arikugira.

Orikwebembera ekibiina ky’obugaari omu Uganda, Sam Muwonge, naagira ngu ahabw’okugira enguuto zifunzire omundembo omu ihanga, bacweiremu kuvugira empaka z’obugaari aheeru y’endembo.

#WestSports

LEAVE A REPLY