Ebikaaka byonka kuhika ahamukoro gwa Cheptegei

415
0
SHARE

N’ebya Javier Silas Omagor

Abantu b’ebitiinisa omu Uganda n’aheeru y’ihanga nibo baahamize ku barikuza kuhika ahamukoro gwa Joshua Cheptegei n’omukazi we Caro Yeko Kamari ogw’obushwere ogurikuza kukorwa omumuringo ogw’obunyakare

Okwezi okuhwaire, ababiri aba bakaranga omukoro gwabo ahakanisa ya Shining Light of God Ministries, Church omu tauni ya Kapchorwa.

Mbwenu, aharwamukaaga 30.10.2021 omukoro ogu nigwija kuba guriho abairuki rurangaanwa kuruga omuri Bugwa bwa Africa, abebembezi b’amakampuni gatari gamwe na gamwe, n’abanyabutegyeki n’ebindi bikaaka.

Omuhwezi w’omugambirizi w’eishengyero Anita Among niwe arikuteekateekwao omugyenyi mukuru arikujwekyera mukuru w’ihanga Yoweri Museveni

“Omuhwezi wa sipiika w’ishengyero aine amatwengye ahabw’eki Cheptegei acweiremu kukora kandi araganeire kwehikira ahamukoro,” Joseph Sabiti orikwebembera eby’amakuru omu ofiisi y’omuhwezi wa sipiika nikwo agambeire abanyamakuru.

Among, orikuruga omuri Bukedea eherereire omu ba Cheptegei n’omuhagizi w’amaani owa Ceptegei n’eby’emizaano okutwariza hamwe.

Naahabura ngu, “eby’obushwere biine omugasho muhango omukutunguura abanyamizaano,”

Ekibiina kya Cheptegei ekirikugyenderera kutunguura entaranta nikiija kutongozibwaho nyencakare orwakataano obugyenyi butakabaireho.

Orikwebembera kampuni ya Vision Group, Don Wanyama, kandi hoona otwaire ari munywani wa Cheptegei ayikiriize kuza ahamikoro yombi

“Joshua ni munywani wangye w’ira kandi anshabire kwegaita omubagyeni abandi ahakutongoza ekibiina kye kandi naanye ninyenda kuba ndiho,” Wanyama nikwo agizire.

Wanyama, kandi hoona nawe orikukunda eby’eminzaano, ahimbiise ekiteekateeko kya Cheptegei eky’okutandikaho ekibiina, ekigyendereire kuhwera abatarikwebaasa hamwe n’okutunguura entaranta na munonga omuri Bugwa-izooba bwa Uganda.

Obwo arikuraganisa kushagika Cheptegei, Wanyama agizire ngu ogwo nigwo murungi gw’okugaruriza ekyanga kye.

Kandi ahaby’obushwere Wanyama ayongyeire yaahimbisa Cheptegei ahabw’okucwamu kuteera orutambo oru.

“Nk’omushaija ori omubushwere, ninkihamya ngu eka ehami n’ey’omugasho ah’ihanga,” nikwo agizire.

“Nshemereirwe ahabwa Joshua na Kamari kukora encwamu egi ahabw’okuba abantu bato abaingi nibakira kutiina okuza omubushwere omubutongore,” nikwo Wanyama ayongyeireho.

Robert Kabushenga ou Wanyama yagiire omubigyerekandi hoona nawe n’omwe ahari banywani b’eka ya Cheptegei nawe nateekateekwa kuhika ahamukoro ogu

Abanyamizaano ab’amaani nka Stephen Kiprotich, owasingire omudaari gwa GOLD omugwa 2012, owasingire omudaari gwa GOLD  omumpaka za Commonwealth Moses Kipsiro, Peruth Chemutai n’abandi ni bamwe ahari abahamize ku barikuza ahamukoro ogu

“Niwe mwiruki murungi omu ihanga obwa hati kandi tokaamanya nabaasa kuba niwe murungi omubyafaayo kandi n’eky’omugasho ahabw’okugira ngu naaha eky’okureeberaho ahari abo abarikwenda kuba nkawe,” Moses Kipsiro kandi hoona we oherize kuza omubushwere emyaka mikye enyima.

LEAVE A REPLY