Ekibiina ky’omuzaano gwa Ludo nikyetaaga obuhwezi

645
0
SHARE

N’ebya Shafik Ssenoga na Arnold Bwembe.

Ekibiina ekirikukurira omuzaano gwa Ludo omu Uganda ekya Uganda Ludo Federation (ULF) nibasherura obuhwezi bwa sente kuhwera tiimu y’eihanga kubaasa kuza omumpaka z’amahanga ga Africa yoona eza Ludo ezirikuza kubaho omuri South Africa okwezi okurikwija.

Okurugiirira ahari Purezidenti w’ekbiina eki Hussein Kalule, bakaba babaririire miriyooni 115 kwonka batungire miriyooni 10 zonka kuruga omukakiiko k’eby’emizaano ak’eihanga

“N’obu National Council for Sports eraabe etuhaireyo obuhwezi, hoona tweyongyeire kushaba gavumenti kutuhwera kutunga sente ezindi. Kandi twine amatsiko ngu bariyo nibakora hakushaba kwaitu,” nikwo Kalule arikugira.

“Kandi hoona nabwo tugyerizeho kuhikiirira kampuni zitari zimwe na zimwe kutuhwera kandi n’obu haraabe hataine abaarugireyo kutugarukamu, twine amatsiko ngu nibaija kutuhwera. N’abo abarikukunda omuzaano kandi abarikutwendeza ebirungi, nitubashaba ngu batuhwere ahabw’okuba ezi n’empaka z’orurengo rw’ahaiguru kandi titurikwenda ngu zitusigye,”

Ebi Kalule abigambire bwanyima y’okweta tiimu y’abaazani 32 kwija bakatandika kwetebeekanisiza emizaano.

Hoona abazaani aba abeetsirwe nibaija kuzaana emizaano y’okwegyezamu omubyanga ebya Burengyerwa-izooba na Bugwa-izooba batakakyendeeziibwe kuhika ahari 8 abarikwija kujwekyera eihanga.

Abazaani 8 aba nibaija kwegaitwaho abakungu 4 kandi abo nibo baraakore tiimu erikuza kuza South Africa.

Huzaifa Matovu kandi hoona ori omwe ahari tiimu erikuza kandi kaputeni wa tiimu eya King Ludo Club aine okwikiriza ngu tiimu y’eihanga neija kukora kurungi munonga nk’oku barikubaasa ku  baraahikye omuri South Africa.

“Naitwe turi barungi kandi nitwija kuhayana omumpaka ezi. Okuba aha tiimu eyetsirwe nikyoreka ngu naanye ndi murungi. Nyine amatsiko ngu  ninyija kuza ahari abu baraayete kuza South Africa. Ku ndikureeba ahatiimu yaitu, nindeeba ngu erimu entaranta nto kandi abaine obukugu abarikuza kuhisya tiimu ahabusinguzi,” Matovu nikwo arikugira.   

Empaka ezi niziijakuba ziri omururembo Johannesburg 26-28.11.2021 beitu Uganda eine kuriitana n’amahanga g’amaani nka South Africa Egypt na Nigeria omumpaka ezi

LEAVE A REPLY