Oku tiimu ziraakwatane omuza Uganda Premier League

279
0
SHARE

N’ebya Shafiq Ssenoga
 
Kiraabu z’emipiira ziherize siizoni ehweire yoona barikwetomboitwa ahamizaano y’emipiira erikuteebwaho omubwire bukwataine. Nangwa abamwe beyongyeireyo bayegyekyererera okusingwa emizaano yaabo yoona ahanshonga egi.

Ku turikureeba ahantebeekanisa y’emizaano eshohoziibwe wiiki ehweire, za kiraabu niziija kuba ziine obwire bukye kugira ngu babe baagarukiremu amaani g’okuzaana omuzaano ogurikuba nigukurataho.  
Omumizaano y’amaani eraabe netandikaho empaka ezi, abaasingwire ekikopo kya Uganda Premier League nibaija kutandika n’abaherize kwija omumpaka ezi aba Arua Hills ahakishaayi kya Betway Muteesa II ahari Wankulukuku ebiro 15.10.2021

Kandi n’abo abarikubaasa kuhayanira kurungi ekikopo eki aba KCCA FC nibaija kuba nibakwatana na Wakiso Giants na Police ahi baraabe nibabataayayira kandi URA nibaija kutandika empaka ezi omukwa 11 bwanyima y’okugumizamu barikuzaana eza CAF Confederation Cup.

Hoona n’obu baraabe bashohoize engyenderwaho y’emizaano egi n’obu eraabe etakahamiibwe kurungi , Gadaffi, SC Villa, URA na Tooro United bahairwe kuhisya eriizooba kukora ahabishaayi byabo nainga basherure ahandi ah’okuzaanira.

Kiraabu ya Busoga United bo tibateirwe ahantebeekanisa y’emizaano egi ahabw’okuba tibabaasize kuhisya abazaani 15 abu ebiragiro bya FUFA birikwetaagisa. Beitu kiraabu egi eya Jinja ebaire ehairwe ebiro 2 kujuriza.

Ku orikureeba oku tiimu ezi zeetebeekaneise siizoni etakatandikire, okurwanira ekikopo nikwija kuba kuri ahagati ya Express Vipers, URA na KCCA. Empaka ezi niziija kuza omukahuumuro kumara wiiki 2 kwenda ngu tiimu y’ihanga eya Uganda Cranes eyetebeekanise kuza omumizaano y’okusherura abaraazaane empaka z’ekikopo ky’ensi yoona ahi barikwija kuba nibazaana na Kenya 11.11.2021 na Mali 14.11.2021

Kwenda ngu bakuratire ebiragiro ebyateirweho ekitongore ky’eby’amagara kwetantara okujanjaara kwendwara ya #COVID19, abagizi tibarikwija kwikirizibwa kutaaha omubishaayi kandi bamwe omubazaani nibaija kukyeberwa nk’ekiragiro kandi nibaija kuba baine okugyemesibwa omubazi gw’endwara egi.

Encuro y’okubanza neija kuba neehwa 09.01.2021

Uganda Premier League
Okwa ikumi ebiro 15

Express v Arua Hill
Mbarara City v Soltilo Bright Stars
Onduparaka v UPDF

Okwa ikumi ebiro 17
Police v Vipers
Wakiso Giants v KCCA
SC Villa v BUL

#WestSports

LEAVE A REPLY