N’ebya Aloysius Byamukama,
Omuri Belgrade, Serbia.
Tiimu ya Uganda etandikire kurungi omumpaka z’amashomero g’ensi yoona aga siniya eziriyo nizihindira omururembo Belgrade omuri Serbia obwo barikurundaana emidaari ya GOLD.
Ekikoosi eky’abairuki, kandi nk’oku kibeire nikitekateekwa kuba, kitwaire emidaari 3 ya GOLD hamwe n’ogundi ogwa BRONZE obwo emizaano erikutandika omururembo oru orw’eihanga rya Buraaya
Jacintah Katushabe, Loice Chekwemoi na Victor Cherotich buzima tibareebize abu bagyenzire nabo hamwe n’eihanga rya Uganda hamwe n’abo boona abarikubaikiririzamu obu bairukire kumara empaka ezi babeire barimu kandi bakarugayo nk’abasinguzi
Ow’okubanza abeire ari Jacintah Katushabe owa Old Kampala oyirukire mita 400 nikwo kuhenderera ahasekonda 57:98 nikwo kusinga Anna-Maria Khimich owa Ukraine kandi hoona omariire ahasekonda 59:37.
Minisita w’eby’obwegyese kandi hoona oyebembeire ekikoosi eki Hamson Obua na kamishana w’eby’obwegyese n’eby’emizaano Rev. Can. Duncans Mugumya babeire nibeereebera n’agaaboobwo barikuha amaani Loice Chekwemoi obu asigire abaishiki bataahi be omumpaka za mita 1500 oteebirwe na Victor Cherotich osigire aboojo bataahi be boona akabakora kubi omu mita nizo zimwe.
Okwo nikwo Uganda etandikiireho okujaguza
Ahi eizooba rigiire kuhenderera Uganda hoona egarukire yatunga omudaari gwa Bronze kuruga omukwiruka akati k’abaishiki ka mita 100 emirundi 4 ahi Uganda ehendeire ekurateire Ukraine na Namibia.
“Ninyebaza Ruhanga ahabw’omudaari gwa GOLD kandi nimpurira ninyesiimisa abatendeki bangye abariyo nibakora buri kimwe kyona ekirikubaasika kureebeka ngu naahikiiriza ekirooto kyangye ky’okusingura omudaari gwa Olympics,” Loice Chekwemoi nikwo agizire.
Nyensya eboneire
Minisita Obua weena abeire aijwire amasemererwa bwanyima y’okureeba entaranta nto eziriyo nizitendekwa kuza omubigyere by’abairuki rurangaanwa nka Joshua Cheptegei na bataahi be.
Ekya Gavumenti kucwamu bakashagika tiimu egi eya Uganda omumpaka ezi ez’ab’emyaka y’ahansi n’akamanyiso akarikworeka ngu itwe nk’ekitongore tushemereire kuba nitumanya eky’okukora kutendeka kandi tukatunguura entaranta eziraije kutwara obujunaanizibwa bw’okwimusya ebendera y’eihanga aharurengo rw’ensi yoona. Obu twaine aba, nyensya yaitu eboneire buzima,” Obua nikwo agizire.
Uganda hoona egarukire yayetaba omu Chess, Basketball, Badminton, Table Tennis na Swimming ahi tiimu ya Uganda eya 3*3 egutwire France n’obugoba 9 ahari 3 na India n’obugoba 9 ahari 6. Aho niho ebeire yaatungira omugisha gw’okutwara omudaari beitu ebeire esingirwe Ukraine n’obugoba 10 ahari 5 Serbia 2 n’obugoba, 7 ahari 6 na Serbia 1 n’obugoba 7 ahari 4.
Amatsiko g’emidaari gari omubaishiki n’aboojo abarikuzaana Badminton ahi Eric Ofoyuru na Akbar Oduka bariyo nibakora kurungi omubikoosi ebi barimu
Emizaano egi erikuza kumara wiiki yoona neija kwigurwaho omubutongore nyencakare orwakashatu 15.09.2021 kandi niziija kuhendera hoona nabwo omubutongore ebiro 19.09.2021
#WestSports
#TVWestAt10
