Abanya Rwanda barinzirwe engyenderwaho y’eihanga

280
0
SHARE

N’ebya John Masaba

Minisita w’eby’amakuru, empurizana na kanyabwengye, Dr. Chris Baryomunsi naagira ngu amakuru agarikushoshora agarikugamba ahabanyarwanda tigahikire kureka gaine ekigyendererwa ky’okubiba embibo y’embushukane n’obutakwatanisa ahagati y’abanya Rwanda hamwe n’enganda ezindi omu Uganda.

“Ku haraabe haine ekizibu ekiriho, ekizibu ekyo kiri ahagati y’abantu babiri bonka kwonka ti gavumenti ahabw’okuba gavumenti egi netwara abanya Uganda boona nk’abantu abarikwingana,” nikwo agizire.

Minisita abeire naagarukamu ekibuuzo ky’omunya makuru ahari Uganda Media Center nyomwebazyo orwamukaaga ahanshonga ezikwatiraine n’okwetomboitwa kuruga omubyanga bitari bimwe na bimwe kugumize ngu oku barikutwarizibwamu nikutaana ahakw’abandi ahabw’oruganda rwabo.

Eki kiizireho enshumi nkye bwanyima y’omuhwezi wa mukuru w’itendekyero rya Victoria University, Dr. Lawrence Muganga, kandi hoona orikwatura buriijo ku ari omwe ahabanyarwanda, akwatsirwe wiiki ehweire.

Muganga nabwo atweire ari omwe ahari abo abarikwenegyeza ekiteekateeko ky’okugira ngu abanya Rwanda abarikutuura omu Uganda beetwe “Abavandimwe” agumize ngu nibashoroorwa omunganda ku barikuba nibeetwa “Abanya Rwanda”.

Omumwabazyo gw’orwakana bwanyima y’okukwatwa kwa Muganga, omugambirizi w’amahe ga UPDF, Brig Gen Flavia Byekwaso agizire ngu omuhwezi wa mukuru w’itendekyero akakwatirwa ahamishango y’okutuura omu ihanga obuhenda biragiro hamwe n’okuteekateekwaho kuba entatsi.

“Amakuru agarikujanjaara ahamikutu ya intaneeti agarikugira ngu Dr. Lawrence Muganga abuziibweho tigahikire. Akakwatwa ab’eby’okwerinda omukakwate k’okutata hamwe n’okutuura omu ihanga omubuhenda biragiro,” Byekwaso nikwo yagambire omumwabazyo gw’orwakana.

Ayongyeire yamanyisa ku okucondooza omunshonga egi kwatandikire.
Baryomunsi, hoona ajumiriire omuringo ogu ab’eby’okwerinda bakwatsiremu Muganga kandi yabashaba kuguma nibegyendesereza ahabw’okuba omukiragiro kya Uganda boona abarikuteekateekwaho nibaba bataine mushango kuhisya ahi obujurizi oburikuhamya ku baine omushango burikurugirayo.

Agizire ngu Muganga kandi hoona orekwirwe ahabushoborozi bwa poorisi kandi abeire ashemereire kwetwa akareebekaho omumaisho ga poorisi ahabw’okugira ngu n’omuntu w’ekitiinisa. “Nimpamya ngu abeire naija kwikiriza,” nikwo agizire.

#WestUpdates
#TVWestAt10

LEAVE A REPLY